काँग्रेसच्या अपप्रचाराला जशास तसे उत्तर द्या!

मुंबई  – राफेल विमान खरेदी प्रकरणावरून कॉग्रेसने भाजपविरोधात देशभर रान उठवले असतानाच कॉंग्रेसच्या अपप्रचाराला जशास तसे उत्तर द्या, असे आवाहन भाजपाचे ज्येष्ठ नेते व केंद्रिय मंत्री नितीन गडकरी यांनी कार्यकत्र्यांना केले आहे. काँग्रेसकडून होणारे आरोप हे पूर्णपणे तथ्यहिन आहे. विमान खरेदीत कोणताही भ्रष्टचार झालेला नाही, काँग्रेसकडून केवळ दिशाभूल करण्याचा प्रयत्न सुरु असल्याचा आरोप त्यांनी यावेळी केला. वांद्रे येथे रंगशारदा सभागृहात भाजपच्या दोन दिवसीय प्रदेश कार्यसमिती बैठकीचा गुरुवारी समारोप झाला.

या बैठकीला संबोधित करताना केंद्रीय मंत्री नितिन गडकरी यांनी कार्यकत्र्यांना काँग्रेसच्या अपप्रचाराला जशास तसे उत्तर देण्याचे आवाहन केले. राफेल विमान खरेदी प्रकरणी  रिलायन्ससोबत २०१२ सालीच करार झाला होता. त्यावेळी तशा बातम्याही आल्या होत्या. पंतप्रधान नरेंद्र मोदी यांचा यात दुरान्वयेही संबंध येत नाही. दोन देशांमधील हा करार असून भारताला आज लढाऊ विमाने आणि हेलिकॉप्टर्सची गरज असल्याचेही ते म्हणाले. महाराष्ट्रातील सिंचन प्रकपांसाठी केंद्र सरकारने ४० हजार कोटी रूपये मंजूर केले आहेत. हा निधी प्रकल्पांना तातडीने मिळावा यासाठी देखील पावले उचलण्यात आली आहेत, असेही त्यांनी सांगितले.