काँग्रेसच्या गुजरात प्रभारीपदी खा. राजीव सातव

नवी दिल्ली : काँग्रेस अध्यक्ष राहुल गांधी यांच्याकडून महाराष्ट्रातील काँग्रेसचे खासदार आणि युवा नेते राजीव सातव यांच्यावर मोठी जबाबदारी दिली गेली आहे. गुजरात काँग्रेसच्या प्रभारीपदावर खा. सातव यांची नियुक्ती करण्यात आली. ऑल इंडिया काँग्रेस कमिटीकडून परिपत्रक काढून यासंदर्भात घोषणा करण्यात आली.

गुजरात काँग्रेसची युवा टीम!
गुजरात म्हणजे पंतप्रधान नरेंद्र मोदी यांचे गृहराज्य आहे. त्यामुळे पंतप्रधानांच्या राज्यात काँग्रेसला उभारी देण्याची जबाबदारी राजीव सातव यांच्या रुपाने एका मराठी आणि तरूण नेत्यावर आली आहे. विशेष म्हणजे, गुजरात विधानसभेच्या निवडणुकीवेळी खासदार राजीव सातव यांनी सहप्रभारी म्हणून काम पाहिले होते आणि गुजरातमध्ये भाजपला जेरीस आणण्यास सातव यांनीही मोठी भूमिका पार पाडली होती. तिथे त्यांच्यावर हल्लाही झाला होता. सातव हे काँग्रेसमध्ये या घडीला संपूर्ण राज्याचा प्रभार दिलेले सर्वात तरुण नेते ठरले आहेत. याशिवाय, गुजरातमध्ये काँग्रेस अध्यक्ष अमित चावडा (42 वर्षे) विरोधी पक्षनेते, परेश धनानी (41 वर्षे) आणि प्रभारी राजीव सातव (43) अशी सगळी युवा टीम बनली आहे.