काँग्रेसने ‘या’ अभिनेत्रीकडे सोपवले सोशल मीडिया टीमचे प्रमुखपद

नवी दिल्ली। मागील काही महिन्यांपासून काँग्रेसमध्ये संघटनात्मक बदल करण्याची मागणी केली जात होती. त्याची प्रक्रिया आता सुरू झाल्याचे संकेत मिळत आहेत. एकाच झटक्यात सर्वकाही बदलून टाकण्यापेक्षा काँग्रेस पक्षश्रेष्ठी पक्षात हळूहळू बदल घडवून आणत आहेत. एका इंग्रजी वृत्तपत्रानुसार काँग्रेसने दीपेंदर सिंह हुड्डा यांच्या जागी कर्नाटकच्या माजी खासदार व चर्चित कन्नड अभिनेत्री राम्या यांना पक्षाच्या सोशल मीडिया टीमचे प्रमुखपद दिले आहे. पार्टीला सोशल मीडियामध्ये अधिक आक्रमक बनविण्यासाठी हा बदल करण्यात आला आहे. ही टीम काँग्रेसची अधिकृत वेबसाइट, ट्विटर, फेसबुक सारखे अकाउंटची जबाबदारी सांभाळेल.

अनेक हिट चित्रपट देणार्‍या ग्लॅमरस राम्या यांना कन्नड सिनेमाची ’गोल्डन गर्ल’ म्हटले जाते. लोकसभेत निवडून आलेली ही पहिली कन्नड अभिनेत्री आहे. 29 नोव्हेंबर 1982 रोजी जन्मलेल्या राम्या यांचे मूळ नाव दिव्या स्पंदना आहे. 2003 मध्ये कन्नड फिल्म ’अभी’ पासून फिल्मी दुनियेत पाऊल ठेवणार्‍या दिव्या स्पंदनाने आपले नाव बदलून राम्या ठेवले होते. तिने कन्नडशिवाय काही तमिल आणि तेलुगु चित्रपटांमध्ये काम केले आहे.

राम्या यांची आई रंजीता कर्नाटकमधील काँग्रेसच्या वरिष्ठ नेत्या होत्या. तर त्यांचे पिता आर टी नारायण एक प्रसिद्ध उद्योगपती होते. 2011 मध्ये भारतीय यूथ काँग्रेस ज्वाइन करणारी राम्या 2013 मध्ये मांड्या लोकसभा मतदारसंघात झालेल्या पोटनिवडणुकीत विजयी होऊन संसदेत पोहोचली. परंतु 2014 मध्ये ती पराभूत झाली. यापूर्वी पक्षाने काही मोठ्या नेत्यांचे पद बदलले आहेत. महासचिव दिग्विजय सिंह यांच्याकडून गोवा व कर्नाटकचा प्रभार काढून घेण्यात आला व त्यांच्या जागी के.सी. वेणुगोपाल यांना कर्नाटकचे प्रभारी तर चेला कुमार यांच्याकडे गोव्याचा प्रभार सोपवला. कर्नाटकचे प्रभारीपद देण्याबरोबरच वेणुगोपाल यांना महासचिव पदही सोपवले आहे.