काँग्रेससोबत राहूनच शिवसेना नगरपालिका निवडणूक लढणार

नंदुरबार । काँग्रेस सोबत राहूनच शिवसेना नगरपालिका निवडणूक लढणार आहे,अशी अधिकृत घोषणा सेनेचे जिल्हाप्रमुख विक्रांत मोरे यांनी काँग्रेसचे जिल्हाअध्यक्ष आ. चंद्रकांत रघुवंशी यांच्या उपस्थितीत घेण्यात आलेल्या पत्रकार परिषदेत केली. नंदुरबार नगरपालिका निवडणुकीत शिवसेनेने काँग्रेस सोबत सेटिंग केल्याची चर्चा होती. यादृष्टीनेच राजकीय हालचाली सुरू होती या चर्चांना आता पूर्ण विराम मिळाला आहे.

प्रचारात देखील सोबत करण्याची ग्वाही
शिवसेनेचे जिल्हाप्रमुख विक्रांत मोरे यांनी पत्रकार परिषद घेऊन काँग्रेस सोबत शिसेनेची युती असल्याचे अधिकृत जाहीर केले. यावेळी त्यांच्यासमवेत काँग्रेसचे अध्यक्ष आ.चंद्रकांत रघुवंशी हे देखील उपस्थित होते. मोरे म्हणाले की, स्थानिक पातळीवर निर्णय घेऊन नपा निवडणूक काँग्रेस सोबत लढविण्याची तयारी केली आहे. याबाबतचा अहवाल पक्ष प्रमुख उद्धव ठाकरे यांना कळविण्यात आला आहे.

विजयी पतका फडकविण्याचा निर्धार
या निवडणुकीत शिवसेनेने 11 जागांची मागणी केली आहे. त्यात तडजोड होऊन जागा निश्‍चित करण्यात येतील, प्रचारदेखील सोबतच करणार असून सर्वच जागांवर आम्ही विजयाची पताका फडकविणार आहोत असा विश्‍वास त्यांनी व्यक्त केला. यावेळी आ. चंद्रकांत रघुवंशी म्हणाले की, सेनेने 11 जागा मागितल्या आहेत,त्यावर मार्गकाढून काँग्रेस सेना युती निवडणूक रिंगणात उतरणार आहे.