काँग्रेस नेते बाबा सिद्दीकींच्या घरावर ईडीचे छापे

मुंबई । काँग्रेस नेते आणि माजी मंत्री बाबा सिद्धिकी यांच्या मालकीच्या 6 ठिकाणांवर ईडीने छापे घातले आहेत. वांद्रे इथल्या झोपडपट्टी पुनर्वसन योजनेत मनी लॉन्ड्रिंग केल्याचा सिद्धिकी यांच्यावर आरोप आहे. कोट्यवधी रूपयांची ही मनी लॉन्ड्रिंग असल्याचे सांगण्यात येते. सिद्धिकी यांचे जवळचे सहकारी आणि बिल्डर रफीक मकबूल कुरेशी यांच्या घरावरही ईडीने छापे घातले आहेत. या छाप्यांविषयी माजी मंत्री बाबा सिद्धिकी किंवा काँग्रेसकडून कोणतीही प्रतिक्रिया अजून आलेली नाही. बाबा सिद्धिकी हे काँग्रेस नेत्या प्रिया दत्त यांचे राजकारणातील राईट हँड मानले जातात. राजकीय वर्तुळात बाबा सिद्धिकी यांचा वांद्रे परिसरात दबदबा असल्याचे सांगण्यात येत.

सहकारी बिल्डर रफीक मकबूल कुरेशी यांचा हात असल्याचा आरोप
वांद्रे येथील झोपडपट्टी पुनर्वसन योजनेत 100 कोटींच्या घोटाळ्यात बाबा सिद्दीकी आणि त्यांचा एक सहकारी बिल्डर रफीक मकबूल कुरेशी यांचा हात असल्याचा आरोप आहे. त्यावरूनच ही छापेमारी झाली आहे. बाबा सिद्दीकी आणि रफीक कुरेशी यांच्या मिळून 5 ठिकाणांवर ही छापेमारी करण्यात आली आहे. बनावट दस्तऐवज बनवून पैसे लाटल्याचा त्यांच्यावर आरोप करण्यात आला आहे. नियमानुसार वांद्रे परिसरातील झोपडपट्टीचा विकास करायचा असेल, तर त्यातील एक भाग झोपडपट्टीधारकांसाठी ठेवावा लागतो. मात्र बनावट कागदपत्रं बनवून हा घोटाळा केल्याचा ठपका बाबा सिद्दीकी आणि रफीक कुरेशी यांच्यावर ठेवण्यात आला आहे.

बाबा सिद्दीकींच्या अडचणीत वाढ
बाबा सिद्दीकी हे काँग्रेसचे माजी आमदार आहेत. ते वांद्रे पश्‍चिम मतदारसंघातून तीनवेळा निवडून आले होते. मात्र 2014 च्या विधानसभा निवडणुकीत मुंबई भाजप अध्यक्ष आशिष शेलार यांनी त्यांचा जवळपास 26 हजार मतांनी पराभव केला. बाबा सिद्दीकी हे इफ्तार पार्टी आयोजनासाठी प्रसिद्ध आहेत. बॉलिवूडमधील मंडळी विशेषत: सलमान खान आणि शाहरुख खान यांना इफ्तार पार्टीच्या निमित्ताने एकत्र आणण्याचे काम बाबा सिद्दीकी यांनी अनेकवेळा केले आहे. या छापेमारीदरम्यान बिल्डर रफीक कुरेशी यांच्या कंपनीने बाबा सिद्दीकींच्या कंपनीला पैसे दिल्याचे समोर आले आहे. त्यामुळे बाबा सिद्दीकींच्या अडचणी वाढल्या आहेत.