कात्रज-कोंढवा रस्त्याची फेरनिविदा काढावी

कात्रज । शहरातील बहुचर्चित कात्रज-कोंढवा रस्त्याच्या निविदेला दिलेली मुदतवाढ बेकायदेशीर आहे. निविदा कामकाज नियमाचे उल्लंघन झाले असून निकोप दर्जाची स्पर्धा झालेली नाही. त्यामुळे ही निविदा रद्द करून फेरनिविदा काढावी, अशी मागणी शिवसेनेचे नगरसेवक बाळा ओसवाल यांनी केली आहे. पालिका आयुक्त कुणाल कुमार यांना दिलेल्या निवेदनात शहरातील कात्रज-कोंढवा रस्ता नव्याने तयार करण्यात येणार आहे. त्यासाठी यापूर्वी काढण्यात आलेली निविदा वादग्रस्त ठरली होती. त्यामुळे ही निविदा रद्द करण्याचे आदेश मुख्यमंत्री देवेंद्र फडणवीस यांनी
दिले होते.

पूर्वगणनपत्रक 215 कोटीचे
त्यानंतर या रस्त्याची पुन्हा निविदा काढण्यात आली. त्यावेळी या रस्त्याचे पूर्वगणनपत्रक 215 कोटीचे आहे. मात्र या निविदेला नियमाबाह्य 15 दिवसांची मुदतवाढ दिली आहे. पालिकेच्या निविदा प्रक्रियेचे नियम डावलून बयाणा रक्कम डीडी स्वरूपात घेऊन गोपनीयतेचा भंग केला आहे. यामध्ये निकोप स्पर्धा झालेली नाही.त्यामुळे ही निविदा रद्द करून फेरनिविदा काढण्यात यावी. ठेकेदारांची नावे उघड झाल्यामुळे स्पर्धेत वाव राहिलेला नाही. या कामाची निविदा पुन्हा नव्याने मागविण्यात यावी. या निविदेमधील जाचक अटी-शर्ती शिथील करून आणि जॉइंट व्हेंचरला मान्यता देऊन पूर्णतः पारदर्शकपद्धतीने निविदा प्रक्रिया राबवावी. निविदा प्रक्रियेचे तंतोतंत पालन न केल्यास शिवसेनेच्या वतीने आंदोलन करण्याचा इशारा बाळा ओसवाल यांनी दिला आहे.