कामगारांसाठी कार्यशाळेचे आयोजन

‘आयुष्य सुंदर आहे’ कार्यक्रम

भोसरी : अभियांत्रिकी महाविद्यालय आणि औदयोगिक आस्थापना यांच्या कराराअंतर्गत कामगारांसाठीच्या कार्यशाळेचे आयोजन नुकतेच येथे करण्यात आले. पिंपरी चिंचवड एज्युकेशन ट्रस्ट तसेच नूतन महाराष्ट्र विद्या प्रसारक मंडळ संचलित नूतन अभियांत्रिकी यांच्यावतीने येथील केदार इंडस्ट्रिज मधील कामगारांसाठी ‘आयुष्य सुंदर आहे’ या विषयावर कार्यशाळा आयोजित करण्यात आली. संस्थेचे करिअर मार्गदर्शक प्रा. विजय नवले यांनी या प्रसंगी मार्गदर्शन केले.

सकारात्मक विनियोग करा
प्रा. नवले म्हणाले की, आयुष्य सुंदर असल्याची भावना आपल्यास कायम आनंदी आणि समाधानी ठेवते. दिवसातल्या प्रत्येक क्षणाचा सकारात्मक विनियोग करा. आपली मनोवृत्ती आपल्या जीवनातील सुख ठरवत असते. व्यायाम, वाचन, डायरी, जनसंपर्क, कला कौशल्य आदींचे जीवनातील महत्त्व त्यांनी यावेळी विशद केले. केदार इंडस्ट्रिजचे सूर्यकांत जाधव, नूतन तंत्रनिकेतनचे प्रा. धनाजी जाधव या वेळी उपस्थित होते. कार्यशाळेनंतर उपस्थितांनी मनोगत व्यक्त करून आनंद व्यक्त केला.