काय आहे सनबर्न फेस्टिव्हल?

सनबर्न हा पूर्णत: व्यावसायिक इडीएम अर्थात इलेक्ट्रिक डान्स म्युझिक फेस्टिव्हल आहे. इडीएम यावरूनच हा फेस्टिव्हल कसा असेल? याचा अंदाज बांधता येईल. डीजेचा ठोका, चकाकणारं लाइटिंग आणि बेधुंद तरुणाई असं थोडक्यात वर्णन या सनबर्न फेस्टिव्हलचं करता येईल. हा आशियातील सर्वांत मोठा, तर जगातील पहिल्या 10 फेस्टिव्हल्सपैकी एक म्युझिक फेस्टिव्हल असल्याचा दावा करण्यात येतो. वेगवेगळ्या रंगात, वेगवेगळ्या ढंगात, बेफिक्रे तरुणाई बेभान होऊन यात सहभागी होतात. बिनधास्त डान्स, रापचिक म्युझिक आणि धुंदी आणणार्‍या लाईट्समुळे हा फेस्टिव्हल परिचीत आहे. या फेस्टिव्हलमध्ये केवळ म्युझिक आणि डान्स नाही तर विविध कला, खान-पान, थरारक गेम्स, कलाकुसर, हस्तकलांचा मेळा इथे भरतो. त्यामुळे इथे यायचं आणि इथलंच होऊन जायचं, असं आयोजन करण्यात येतं. सनबर्न फेस्टिव्हलचं हे पहिलंच वर्ष नाही. गेल्या 9 वर्षांपासून म्हणजेच 2007 पासून गोव्यात हा फेस्टिव्हल सुरू आहे. दरवर्षी इयर एण्डिंगला या फेस्टिव्हलचं आयोजन करण्यात येतं. गोव्यातील हा फेस्टिव्हल यंदा पहिल्यांदाच गोव्याबाहेर हलवण्यात आला आहे. यंदा तो पुण्यात आयोजित करण्यात आला आहे.

सनबर्न फेस्टिव्हलचा इतिहास :
गॉडफादर ऑफ डान्स म्युझिक आणि चढत वरील रोडीज आणि स्प्लिट्स व्हिलाचा अँकर निखील चिनापाने 2007 साली गोव्यात सनबर्न फेस्टिव्हलचं आयोजन केलं होतं. 2007 साली पहिल्याच वर्षी सनबर्नने गोव्याचंच नव्हे तर जगाचं लक्ष वेधून घेतलं होतं. 2008 सालचा सनबर्न फेस्टिव्हल वर्षभरापूर्वीपासूनच चर्चेत होता. 2008 च्या फेस्टिव्हलची इलेक्ट्रिक सर्कस ही थिम होती. त्यासाठी दोन मोठे भव्य स्टेज उभारण्यात आले होते. बनियन ट्री हे ट्रान्स अ‍ॅक्टसाठी तर सर्कस स्टेज हे हाऊस म्युझिकसाठी होतं. याशिवाय, या फेस्टिव्हलमध्ये वस्तू, पदार्थांचे विविध स्टॉल्स आणि बीच व्हॉलिबॉलचाही समावेश करण्यात आला होता. 2009 सालच्या फेस्टिव्हलला 22 हजार प्रेक्षकांनी हजेरी लावली होती. त्याचवेळी सनबर्नच्या रात्रीचे साडेदहा ते पहाटे पाच या टायमिंगने वेळ भेदून तो 24 तासांचा केला. 2010 मध्ये सनबर्न फेस्टिव्हलमध्ये पहिल्याच सिझनला परदेशी कलाकारांनी हजेरी लावली होती. त्यामुळे आधीच गोव्यात परदेशी पाहुण्यांचा ओढा असताना, परदेशी कलावंतही या फेस्टिव्हलला हजेरी लावण्यासाठी मागे राहिले नाहीत. इतकंच नाही तर बॉलिवूड अभिनेता संजय दत्तनेही 2010 सालच्या सनबर्न फेस्टिव्हलला हजेरी लावली होती.

2011 सनबर्न फेस्टिव्हल गोव्यातील कांदोलिम बीचवर व 2012 साली सनबर्न फेस्टिव्हल गाजला. यापूर्वी कांदोलिम बीच 6 सीझन गाजवणार्‍या सनबर्न फेस्टिव्हलने सातव्या सीझनसाठी जागा बदलली. गोव्यातीलच वागातोर इथं सातव्या सनबर्न फेस्टिव्हलची धूम पाहायला मिळाली. यावेळी 120 आर्टिस्ट आणि 200 तासांपेक्षा जास्त म्युझिक ही या सिझनची खासियत होती. 10 मोठे स्टेज आणि 1 लाखांहून अधिक प्रेक्षक यावेळी सहभागी झाले होते.

देशभरात गाजत असलेल्या तरुणाईच्या सनबर्न फेस्टिव्हलने गोव्याची मर्यादा कधीच ओलांडली होती. कॉलेज तरुणांमध्ये सनबर्न फेस्टिव्हलची चर्चा रंगत होती. त्याचवेळी विविध आयआयटी, एनआयटी, आयआयएम आणि अन्य कॉलेजमध्ये सनबर्न फेस्टिव्हल पाहायला मिळाले. सनबर्न फेस्टिव्हलचा आठवा सिझन वागातोर इथंच पार पडला. एरव्ही 3 दिवस चालणारा हा फेस्टिव्हल 2014 मध्ये 4 दिवस झाला. 2015 चा सनबर्न फेस्टिव्हल चार दिवस रंगला. यावेळी गोव्याच्या आंतरराष्ट्रीय तिकीट पार्टनर वियागोगोने सनबर्न फेस्टिव्हलला आशियातील सर्वांत मोठा म्युझिक फेस्टिव्हल जाहीर केलं. जगभरातील 42 पेक्षा जास्त देशातील लोकांनी वियागोगोवरुन सनबर्न फेस्टिव्हलची तिकीटं बुक केली होती.

संजीव वेलणकर, पुणे.