कारमधून लिफ्ट देण्याच्या बहाण्याने बसवून सेल्समनला 39 हजारात लुटले

हॉटेल प्रितम पार्कजवळील घटना ; एमआयडीसी पोलिसांकडून एकाला अटक

जळगाव- कारमधून रेल्वे स्टेशनवर जाण्यासाठी लिफ्ट देण्याच्या बहाण्याने मुंबईच्या मेहुल इंडस्ट्रीजच्या विभागीय विक्री प्रतिनिधी रोहिदास रुखमाजी गायकवाड रा घाटकोपर, मुंबई याला तीन ते चार जणांनी 39 हजार 250 रुपयात लुटल्याची घटना 14 रोजी रात्री 1.45 वाजेच्या सुमारास जळगाव भुसावळ रोडवरील हॉटेल प्रितम पार्क येथे घडली होती. या गुन्ह्यात एमआयडीसी पोलिसांनी मंगलराव खयालीराम राव (इदगाह मोहल्ला, उन्हैल नाल्याजवळ, उन्हैल, ता. नागदा, जि. उज्जैन) याला अटक केली आहे. त्याच्याकडून लुटीच्या रकमेतील 2 हजार रुपये हस्तगत करण्यात आले आहे.

रोहिदास रुखमाजी गायकवाड हे घाटकोपर येथे कुटुंबासह वास्तव्यास आहे. घाटकोपरमधीलच मेहुल इंटरप्रायझेस या कंपनीत रोहिदास विभागीय विक्री अधिकारी म्हणून कामाला आहेत. कंपनीत अनब्रेकेबल फायबर प्लेटस, मेलामाईन प्लेटस असे तयार होते. हे विक्री करण्यासाठी रोहिदास हे प्रत्येक जिल्ह्यात जात असतात. नेहमीप्रमाणे 11 रोजी रोहिदास व त्याच्यासोबत गिरी वाघेला, विक्री व्यवस्थापक सहकार मुंबई येथील सॅम्पल घेवुन जळगाव शहरातील व्यावसायिकांकडे ऑर्डर घेण्यासाठी आले. 12 रोजी काही व्यापार्‍यांकडून ऑर्डर घेवून अ‍ॅडव्हान्स मिळालेली काही रक्कम घेवून ते रामनिवास लॉजवर थांबले. पुन्हा 13 रोजी पुजा कॅटर्स, जोशी कॅटर्स यांची ऑर्डर घेतली. यावेळी पूजा कॅटर्सचे रामचंद्र महाराज यांचेकडे बाकी असलेली 39 हजार 250 रुपयांची रक्कम घेतली व रोहिदास हे एकटे पुन्हा रामनिवास लॉजवर परतण्यासाठी जळगाव, भुसावळ रस्त्यावरील हॉटेल प्रितम पार्कजवळ पायी चालत आले.

रेल्वेस्टेशन सोडण्याच्या बहाण्याने बसविले
हॉटेलजवळ थांबले असता, पांढर्‍या रंगाची कार आली यात चालकासह पाच जण होते. त्यातील एकाने रोहिदास यांना रेल्वेस्टेशन जायचे का? प्रत्येकी 10 रुपये सिटप्रमाणे पैसे लागतील असे सांगितले. रोहिदास चालकाच्या बाजूला सीटवर बसले असता, एकाने त्याच्या खिशातील 39 हजार 250 रुपये काढून त्यांना गाडीच्या लोटून दिले. यानंतर कार घेवून सर्व जण पसार झाले. यावेळी कारमधील संशयितांनी रोहिदास यांची बॅग बाहेर फेकून दिली. याबाबत रोहिदास गायकवाड यांनी एमआयडीसी पोलीस स्टेशन गाठले व सर्व हकीकत सांगितली. त्यानुसार याप्रकरणी एमआयडीसी पोलीस ठाण्यात गुन्हा दाखल करण्यात आला.

संशयिताला 19 पर्यंत पोलीस कोठडी
गायकवाड यांनी संशयितांचे वर्णनही सांगितले होते. 15 रोजी सायंकाळी 5 वाजेच्या पोलीस निरिक्षक रणजीत शिरसाठ यांना कार थांबवून काही जण कुठे जायवयाचे अशी विचारणा करत असल्याची गोपनीय माहिती मिळाली. त्यांनी सहाय्यक फौजदार अतुल वंजारी, रामकृष्ण पाटील, मनोज सुरवाडे, पोलीस कॉन्स्टेबल सचिन पाटील, मुद्दससर काझी यांनी घटनास्थळ गाठले. याठिकाणी मंगलराव खयालीराम राव (इदगाह मोहल्ला, उन्हैल नाल्याजवळ, उन्हैल, ता. नागदा, जि. उज्जैन) याने उडवाउडवीचे उत्तरे दिल्याने त्याच्यावर संशय बळाविल्याने पोलिसांनी त्यास ताब्यात घेतले. कारचा पाठलाग केला मात्र कार घेवून इतर पसार झाले. ताब्यात घेतलेल्या े मंगलरावकडून 2 हजार रुपये जप्त करण्यात आले आहे. 16 रोजी न्यायालयात हजर केले असता न्यायालयाने मंगलराव यास 19 पर्यंत पोलीस कोठड सुनावली. सरकार पक्षातर्फे अ‍ॅड. जी.एम. बारगजे यांनी काम पाहिले. पुढील तपास रामकृष्ण पाटील करीत आहेत.