कार्टून चॅनलवर ‘नो पिझ्झा’!

नऊ कंपन्यांचे सरकारला आश्‍वासन

नवी दिल्ली : पिझ्झा, बर्गर, कोल्डड्रिंक्स अशा जाहिरातींवर बंदी घालण्याचा कुठलाही कायदा सध्या अस्तित्वात नाही. मात्र तरीही या जाहिराती यापुढे कार्टून चॅनलवर दिसणार नाहीत. सूचना आणि प्रसारण राज्यमंत्री राज्यवर्धन राठोड यांनी लोकसभेत ही माहिती दिली. कोकाकोला, नेस्लेसह नऊ कंपन्यांनी सरकारला तसे आश्‍वासन दिल्याचंही राठोड यांनी सांगितले.

खासदार विनायक राऊत यांनी विचारलेल्या एका प्रश्‍नाला उत्तर देताना राज्यवर्धन सिंह राठोड यांनी ही माहिती दिली. अन्न सुरक्षा मानक प्राधिकरणने 11 सदस्यीय समिती गठित केली असून सध्या या समितीच्या रिपोर्टवर अंमलबजावणी सुरु असल्याचेही त्यांनी सांगितले. जंकफूड वरून मुंबईसारख्या शहरांमध्ये बरेच वादळ उठले होते. शालेय विद्यार्थ्यांना अशा जंकपूडपासून लांब ठेवण्याच्या प्रयत्नात सरकार आहे.