कार्ती चिदंबरम यांची संपत्ती जप्त!

बँक खातीही गोठवली, ईडीची कारवाई

नवी दिल्ली : अंमलबजावणी संचालनालयाने (ईडी) सोमवारी काँग्रेस नेते व माजी केंद्रीय अर्थमंत्री पी. चिदंबरम यांचा मुलगा कार्ती चिदंबरम यांची सर्व संपत्ती जप्त केली. बँक खाती आणि 90 लाख रूपये रकमेच्या मुदत ठेवी गोठवण्यात आल्या आहेत. कार्ती यांनी संपत्ती विकण्याचा आणि बँक खाती बंद करण्याचा प्रयत्न केल्याने ईडीने ही कारवाई केल्याचे सूत्रांनी सांगितले. पी. चिदंबरम केंद्रीय अर्थमंत्री असताना त्यांनी अधिकार कक्षेच्या बाहेर जाऊन एअरसेल-मॅक्सिस प्रकरणात विदेशी गुंतवणुकीसाठी मंजुरी दिली होती. तसेच सत्य परिस्थिती लपवून ठेवण्यासाठी विदेशी गुंतवणुकीची रक्कम चुकीची दाखवण्यात आली, अशी माहिती तपासात उघड झाल्याचे ईडीने म्हटले आहे.

चौकशीसाठी हजर राहिले नाहीत
एअरसेल-मॅक्सिस व्यवहारात गैरमार्गांचा वापर केल्याप्रकरणी कार्ती चिदंबरम यांच्यावर तपास यंत्रणा लक्ष ठेवून होत्या. काही दिवसांपूर्वी सीबीआयने त्यांना चौकशीसाठी हजर राहण्याचे आदेश दिले होते; परंतु कार्ती चिदंबरम यांनी नकार दिला होता. विशेष न्यायालयाने मला सर्व आरोपातून मुक्त केल्याने या प्रकरणाची सुनावणी संपली होती, असा त्यांचा दावा होता.

पी. चिदंबरम यांचा दावा
कार्ती चिदंबरम यांना चौकशीसाठी सीबीआयने बोलावल्यानंतर पी. चिदंबरम यांनीही सीबीआयवर ताशेरे ओढले होते. एअरसेल-मॅक्सिसमध्ये एफआयपीबीने (विदेशी गुंतवणूक बोर्ड) शिफारस केली होती. मी या कार्यवाहीच्या विवरणाला मंजुरी दिली होती. सीबीआयने माझी चौकशी केली पाहिजे. कार्तीला त्रास देऊ नये, असे चिदंबरम यांनी म्हटले होते. तसेच निराश सीबीआय चुकीची माहिती पसरवत आहे. एअरसेल-मॅक्सिसमध्ये एफआयपीबीच्या अधिकार्‍यांनी सीबीआयसमोर आपला जबाब नोंदवला असून, त्यांनी ही मंजुरी वैध असल्याचे त्यात म्हटले होते, असा दावा पी. चिदंबरम यांनी केला होता.