कार्ती चिदंबरम यांना सीबीआयकडून अटक

चेन्नई (वृत्तसंस्था) – माजी केंद्रीय अर्थमंत्री आणि काँग्रेसचे ज्येष्ठ नेते पी. चिदंबरम यांचे पुत्र कार्ती चिदंबरम यांना आर्थिक गैरव्यवहाराप्रकरणी सीबीआयने चेन्नईतील विमानतळावरुनच बुधवारी सकाळी ताब्यात घेतले. शीना बोरा हत्या प्रकरणातील मुख्य आरोपी पीटर मुखर्जी आणि इंद्राणी मुखर्जी यांच्या आयएनएक्स मीडिया या कंपनीला 2007 मध्ये नियमापेक्षा अधिक परकीय गुंतवणूक मिळाल्यानंतर ते कायद्याच्या कचाट्यात सापडू नये यासाठी कार्ती चिदंबरम यांनी वडील पी. चिदंबरम यांच्या मदतीने नियम वाकवल्याचा त्यांच्यावर आरोप आहे.

कोट्यवधी रुपयांचा लाभ घेतल्याचा आरोप
बुधवारी सकाळी कार्ती चिदंबरम लंडनमधून परतताच चेन्नई विमानतळावरुन सीबीआयने त्यांना ताब्यात घेतले. काही दिवसांपूर्वीच कार्ती चिदंबरम यांच्या सीएलाही सीबीआयने अटक केली होती. या कारवाईने मोदी सरकारविरोधात काँग्रेस आक्रमक होण्याची चिन्हे आहेत. मोदी सरकारने सूडबुद्धीने ही कारवाई केल्याचा आरोप विरोधकांनी केला. या प्रकरणी सीबीआयने मे 2017 मध्ये गुन्हा दाखल केला होता. पी. चिदंबरम केंद्रात मंत्री असताना नियमबाह्य परकीय गुंतवणूक केलेल्या आयएनएक्स मीडिया या कंपनीला कार्ती यांनी मदत केली आणि त्या मोबदल्यात स्वतःच्या बेनामी कंपन्यांमार्फत कोट्यवधी रुपयांचा लाभ घेतल्याचा आरोप होता. गुन्हेगारी स्वरुपाची फसवणूक करणे, बेकायदा पद्धतीने लाभ घेणे, सरकार अधिकार्‍यांवरील प्रभावाचा गैरफायदा घेणे या कलमांखाली सीबीआयने गुन्हा दाखल केला होता. सीबीआयने या प्रकरणी कार्ती चिदंबरम यांच्या घरावर छापा देखील टाकला होता.

कार्ती चिंदबरम खोट बोलत राहिले
माजी केंद्रीय गृहमंत्री पी. चिदंबरम यांचे पुत्र कार्ती चिदंबरम यांना झालेली सीबीआय अटक ही मोठी कारवाई आहे. सर्व पुरावे कार्ती चिंदबरम यांच्या विरोधात जात असतानाही ते वारंवार सीबीआयशी खोटे बोलत राहिले. त्यामुळे त्यांच्यावर अखेर अटकेची कारवाई करण्यात आली, त्यामुळे आता त्याचे तुरुंगात जाणे निश्‍चित झाले असून, सीबीआय लवकरच त्यांच्यावर आरोपपत्रदेखील दाखल करेल, असे भाजप खासदार सुब्रमण्यम स्वामी यांनी म्हटले आहे. दरम्यान, मोदी सरकारने सूडबुद्धीने ही कारवाई केल्याचा आरोप विरोधकांनी केला आहे