काळेवाडीत गॅस सिलिंडरचा काळाबाजार उघडकीस

छावा मराठा युवा महासंघाच्या पदाधिकार्‍यांनी घातली धाड

पिंपरी-चिंचवड : छावा मराठा युवा महासंघाच्या पिंपरी-चिंचवडमधील कार्यकर्त्यांनी काळेवाडी येथील घरगुती आणि व्यावसायिक गॅस सिलिंडर काळाबाजार उघड केला. यानंतर एखाद्या चित्रपटाप्रमाणे अन्न व नागरी पुरवठा विभागाचे अधिकारी घटनास्थळी पोहोचले. त्यांनी पंचनामा केल्यानंतर सिलिंडरचा साठा पोलिसांच्या ताब्यात दिला.

विना क्रमांकाची रिक्षा
महासंघाचे संस्थापक अध्यक्ष धनाजी येळकर पाटील व पदाधिकारी रहाटणीकडून काळेवाडीकडे बुधवारी जात होते. यावेळी सिद्धनाथ गॅस सर्व्हिस रहाटणी काळेवाडी रोड, या ठिकाणी घरगुती वापराच्या गॅस सिलेंडर एका विना क्रमांकाच्या तीनचाकी टेम्पोमधून, सिद्धनाथ गॅस सर्व्हिस या दुकानात उतरविताना आढळले. तेव्हा हा गैरप्रकार असल्याचे लक्षात आले. अधिक चौकशी केली असता, रतन गॅस एजन्सी काळेवाडी यांच्याकडील घरगुती सिलिंडर वितरणासाठी वापरणात येणारा टेम्पो हा या ठिकाणी घरगुती वापराच्या गॅसचा काळा बाजार करत असल्याचे लक्षात आले.

रतन गॅस एजन्सीचे सिलिंडर
दुकानात पाहणी केली असता 8 बाय 8 जागेत मोठ्या प्रमाणात घरगुती व कमर्शिअल वापराच्या गॅस सिलेंडरचा साठा आढळून आला. त्यावेळी छावा मराठा युवा महासंघ अध्यक्ष पश्‍चिम महाराष्ट्र यांनी 100 नंबरला फोन करून हा गैरप्रकार चालू असल्याचे कळवले. गणेश सरकटे पाटील यांनी पुरवठा विभाग अधिकार्‍याला माहिती देऊन बोलावून घेतले. पिंपळे सौदागर चौकीत ड्युटीवरील पोलीस अधिकार्‍याने मुद्देमाल जप्त करून चौकीत नेला. पुरवठा विभागाचे अधिकारी प्रशांत ओव्हाळ यांनी घटनास्थळी येऊन पंचनामा केला. या प्रकरणी सांगवी पोलीस ठाण्यात गुन्हा दाखल करण्यात आला आहे. कारवाईत छावा मराठा युवा महासंघाचे अध्यक्ष धनाजी येळकर-पाटील, राजेंद्र देवकर-पाटील, गणेश सरकटे-पाटील, सचिन आल्हाट, गौरव धनवे नाना फुगे, विजय लोट आदींनी सहभाग घेतला.