किंग खानच्या भेटीसाठी नाशकातील 6 बहिणींचे घरातून पलायन

नाशिक : बॉलिवूडचा किंग म्हणजेच शाहरुख खान याला भेटायला कोणाला आवडणार नाही? त्याच्या भेटीसाठी सर्वचजण आतूर असतात. पण याच किंग खानच्या भेटीसाठी काही मुंलींनी केलेली स्टंटबाजी आश्‍चर्य आणि धक्कादायक ठरली आहे. नाशिकमध्ये राहणार्‍या एका कुटुंबियातील 6 बहिंणीनी शहारुख खानच्या भेटीसाठी चक्क घरातून पलायन केलं आणि त्याला भेटण्यासाठी थेट मुंबईतील ङ्गमन्नतफ बंगला गाठला. एकाच वेळी घरातल्या सहाही लहान मुली बेपत्ता झाल्याने त्यांचे कुटुंबीय हबकून गेले आणि त्याचबरोबर पोलिसांचीही झोप उडाली होती.

नाशिकमधल्या पंचवटीतल्या आरटीओ कॉर्नरजवळ राहणार्‍या सहा बहिणींनी मंगळवारी रात्री नाशिकच नाही तर कसारा, ठाणे, कल्याण आणि मुंबईतल्या पोलिसांची झोप उडवली. संध्याकाळी राहत्या घरातून बेपत्ता झालेल्या या मुलींच्या काळजीने त्यांचे कुटुंबियच नाहीत, तर पोलिसही चिंतातुर झाले. रात्रभर पोलिस त्यांचा शोध घेत होते आणि बुधवारी पहाटे अखेर या बहिणी थेट बॉलिवूडचा सुपरस्टार किंग खान शाहरुखच्या बंगल्यासमोर सापडल्या. त्या टरबूज खात एन्जॉय करत होत्या. या नाशिकहून बेपत्ता झालेल्या मुलीच असल्याची खात्री पटल्यावर पोलिसांच्या पथकाने सुटकेचा निश्‍वास टाकला.

बारा ते पंधरा वर्ष वयोगटातल्या या सहाही बहिणींनी शाहरुखच्या बंगल्यासमोर येण्यापुर्वी सप्तश्रृंगी गडावर जाऊन देवीचे दर्शन घेतले. त्यानंतर नाशिकरोड रेल्वे स्टेशन गाठत शताब्दी एक्सप्रेसने मुंबई गाठली. त्यानंतर टॅक्सीने त्या शाहरुख खानच्या बंगला मन्नतवर पोहचल्या होत्या. या काळात त्यांचा मोबाईलही स्विच ऑफ झाल्याने त्यांना शोधून काढणे पोलिसांसाठी आव्हान होते.

या घरातील सर्वचजण बॉलिवूडच्या सिनेतारकांचे जबरदस्त फॅन आहेत. सहा बहिणींनी बहुतेक सगळेच अभिनेते आवडतात तर त्यांचे वडील हे अभिनेत्रींचे फॅन आहेत. त्यामुळे त्यांच्या घरावर बॉलीवूडच्या प्रेमाची वेगळीच नशा दिसून येते. पण आपले बॉलिवुड प्रेम जोपसतानाही स्वत:च्या सुरक्षिततेची काळजी घेतली पाहिजे, असे समुपदेशन करुन नाशिक पोलिसांनी या मुलींना त्यांच्या पालकांच्या हवाली केलं. नाशिकच्या पोलिस आयुक्तांनी तर त्यांना बॉलीवूड स्टार्सशी भेट घालून देऊ, पण परत घरातून पळून जायचं नाही, असं प्रेमळ आश्‍वासनच दिले. त्यामुळे या बॉलीवूड फॅन्स बहिणी सध्या चर्चेचा विषय ठरल्या आहेत.