किरकोळ कारणावरून जळगावात एकावर हल्ला

जळगाव : शहरातील सिंधी कॉलनी येथील चेतनदास मेहता हॉस्पिटलजवळ अज्ञात तीन जणांनी काहीही कारण नसतांना तरुणावर धारदार शस्त्राने हल्ला केला. या प्रकरणी एमआयडीसी पोलिस ठाण्यात गुन्हा दाखल करण्यात आला.

दारूच्या नशेत केला हल्ला
भोलासिंग जगदीशसिंग बावरी (25, रा.शिकलकर वाडा, शिरसोली नाका, तांबापूर) हा कुटुंबियांसह वास्तव्याला असून रविवार, 27 फेब्रुवारी रोजी रात्री 11 वाजेच्या सुमारास भोलासिंग बावरी हा सिंधी कॉलनीतील चेतन दास हॉस्पिटलजवळील पान टपरीवर मित्र सागर हटकर आणि राम हटकर यांच्यासोबत गप्पा मारत असताना अज्ञात तीन जणांनी दारूच्या नशेत येवून काहीही कारण नसतांना भोलासिंगला बेदम मारहाण केली. यात एकाने त्याच्या हातातील धारदार शस्त्राने पोटावर वार करून गंभीर जखमी केले. अज्ञात तिघेजण दुचाकीवर बसून पसार झाले. जखमी अवस्थेत भोलासिंग याला मित्र सागर हटकर आणि राम हटकर यांनी तातडीने जिल्हा शासकीय वैद्यकिय महाविद्यालयात उपचारार्थ दाखल केले. सहाय्यक फौजदार अतुल वंजारी, रवींद्र चौधरी, किशोर पाटील, सचिन पाटील यांनी घटनास्थळी धाव घेतली. भोलासिंग बावरी याच्या फिर्यादीवरून एमआयडीसी पोलिसात अज्ञात तीन जणांविरोधात गुन्हा दाखल करण्यात आला. पुढील तपास हवालदार योगेश सपकाळे करीत आहे.