कुपवाडात दहशतवाद्याचा खात्मा

श्रीनगर : जम्मू-काश्मीरच्या कुपवाडा जिल्ह्यात केरन सेक्टरमध्ये सुरक्षा रक्षक आणि दहशतवाद्यांमधील चकमकीत एका दहशतवाद्याचा खात्मा करण्यात आला. यात एक जवान शहीद झाला, तर इतर दोन जवान गंभीर जखमी झाले आहेत. नियंत्रण रेषेजवळील केरन सेक्टरमधील चोकेन चौकीजवर बुधवारी सकाळी साडेसात वाजल्यापासून ही चकमक सुरु झाली ती उशीरापर्यंत सुरू होती. सीमारेषेजवळ दहशतवादी कारवायांमध्ये वाढ झाली असून, कालच जम्मू-काश्मीरच्या हंदवाडा भागात सुरक्षारक्षकांनी तीन दहशतवाद्यांना कंठस्नान घातले होते.

हे तिन्ही दहशतवादी लष्कर-ए-तोयबा या दहशतवादी संघटनेचे सदस्य होते. तसेच ते पाकिस्तानी नागरिक असल्याचेही उघड झाले आहे. हंदवाड्यातील मगम परिसरात हे दहशतवादी लपून बसल्याची माहिती सुरक्षा दलांना मिळाली होती. यानुसार सुरक्षा दलांनी परिसरात शोधमोहीम राबवली. दहशतवाद्यांनी सुरक्षा दलांवर गोळीबार केला. तर सुरक्षा दलांनीही दहशतवाद्यांना चोख प्रत्युत्तर दिले.