कृषी प्रकल्पांसाठी इस्रायलचे सहकार्य घेण्यास सरकार इच्छुक – चंद्रकांत पाटील

मुंबई : इस्रायलचे महावाणिज्यदूत याकोव्ह फिंकेलस्टेइन यांनी आज राज्याचे महसूलमंत्री चंद्रकांत पाटील यांची भेट घेतली. या भेटीत महाराष्ट्र व इस्रायल कृषी सहकार्यासंदर्भात चर्चा करण्यात आली. यावेळी कृषी सचिव एकनाथ डवले आणि कृषी आयुक्त सचिन्द्रप्रताप सिंह उपस्थित होते. महाराष्ट्रातील कृषी प्रकल्पांसाठी इस्रायलचे सहकार्य घेण्यास राज्य सरकार इच्छुक आहे, असे चंद्रकांत पाटील यांनी महावाणिज्यदूत फिंकेलस्टेइन यांना सांगितले.

इस्रायल सरकार आणि भारत सरकारच्या भागीदारीतून ‘इंडो-इस्रायल ॲग्रीकल्चर प्रोजेक्ट’ (IIAP) अंतर्गत महाराष्ट्रात 4 इंडो-इस्रायल सेंटर ऑफ एक्सलन्स उभारण्यात आली आहेत. या सेंटरच्या क्षमतेचा पुरेपूर वापर करण्यासाठी कृषीविषयक प्रशिक्षण सत्रांची संख्या वाढविण्यासाठी प्रयत्न केले जातील. तसेच या सेंटरसाठी राज्य सरकारकडून अधिक निधी देण्यासाठी प्रयत्न करण्यात येतील असेही चंद्रकांत पाटील यांनी सांगितले.