केंद्र सरकारच्या गृह मंत्रालयाकडून अभ्यासासाठी बोरखेडा हत्याकांड प्रकरणाची निवड

रावेर : बोरखेडा रस्त्यावरील शेतात अल्पवयीन मुलीवर अत्याचार करीत तिच्यासह चौघा अल्पवयीन बहिण-भावंडांच्या हत्येची घटना 16 आक्टोबर रोजी उघडकीस आली होती. राज्याला हादरवणार्‍या या घटनेचा जिल्ह्याचे पोलिस अधीक्षक डॉ.प्रवीण मुंढे यांनी शास्रोक्त व वैज्ञानिक पद्धतीने तपास करीत अवघ्या सहाव्या दिवशी या घटनेतील आरोपीला पुराव्यानिशी तात्काळ अटक केली होती. महाराष्ट्रभर गाजलेल्या या हत्याकांडाच्या घटनेची व डॉ.मुंढे यांनी केलेल्या तपासाची दखल केंद्र सरकारच्या गृह मंत्रालयाने घेतली आहे. महिलांविषयीच्या गुन्ह्यांमध्ये देशभरातील वरीष्ठ पोलीस अधिकार्‍यांना अशा घटनांच्या तपासाची दिशा मिळावी या हेतूने ही घटना केंद्रीय गृहमंत्रालयाच्या ब्युरो ऑफ पोलीस रिसर्च ऍन्ड डेव्हलपमेंट या विभागातर्फे अभ्यासासाठी निवडण्यात आली आहे. सोमवार, 8 रोजी महिला दिनानिमित्त दिल्ली येथून या विभागातर्फे महिलांची सुरक्षितता व संवेदनशीलता या विषयावर वेबिनारचे आयोजन करण्यात आल्यानंतर डॉ.मुंढे यात सहभागी झाले तसेच त्यांनी हत्याकांडाच्या घटनेचा व केलेल्या तपासाचा वेबिनारमध्ये सहभागी विविध राज्यातील वरीष्ठ पोलिस अधिकार्‍यांसमोर उलगडा केला.

शास्त्रोक्त पद्धतीने केला तपास
बोरखेडा रस्त्यावरील या घटनेचा पोलिस अधीक्षक डॉ.प्रवीण मुंढे यांनी अत्यंत संयमाने, बारकाईने व शास्त्रोक्त पद्धतीने तपास केला होता. तपासी अधिकारी व कर्मचार्‍यांना त्यांनी दिलेल्या महत्वाच्या टिप्स आरोपीपर्यंत पोहोचविण्यास महत्वपूर्ण ठरल्या होत्या. आरोपीविरुद्ध मिळालेल्या परीस्थतीजन्य, वैज्ञानिक आणि शास्त्रीय पुराव्यामुळे या घटनेचा उलगडा करण्यात रावेर पोलिसांना यश आले होते. यासाठी उपविभागीय पोलिस अधिकारी नरेंद्र पिंगळे, पोलिस निरीक्षक रामदास वाकोडे, शीतलकुमार नाईक यांनीही मोलाची कामगिरी बजावली होती.

गृहमंत्रालयाने घेतली दखल
बोरखेडा हत्याकांडाच्या घटना व तपासाची दखल केंद्रीय गृह मंत्रालयाने घेतली आहे. अशा प्रकारच्या घडणार्‍या घटनांची तसेच महिलांविषयीच्या गुन्ह्यांमध्ये देशभरातील वरीष्ठ पोलिस अधिकार्‍यांना तपासाची दिशा मिळावी यासाठी बोरखेडा हत्याकांडाच्या घटनेची राष्ट्रीय स्तरावरील केंद्र सरकारच्या ब्युरो ऑफ पोलीस रीसर्च अ‍ॅण्ड डेव्हलपमेंट (बीपीआरअ‍ॅण्डडी) संस्थेने अभ्यासासाठी व प्रशिक्षणासाठी निवड केली. महिलांविषयी दाखल होणार्‍या गुन्ह्यांमध्ये पोलिसांमध्ये संवेदनशीलता व सुरक्षिततेची भावना निर्माण व्हावी हा या वेबिनारचा मुख्य उद्देश होता.

राज्यातून एकमेव केसची निवड
सोमवारी दिल्ली येथून बीपीआरअ‍ॅण्डडीतर्फे आयोजित करण्यात आलेल्या या वेबिनारचे उद्घाटन केंद्रीय गृहमंत्री अमित शहा यांनी केले. या वेबिनारमध्ये सहभागी होणार्‍या विविध राज्यातील वरीष्ठ पोलिस अधिकार्‍यांच्या अभ्यासासाठी व प्रशिक्षणासाठी चार केसेस ठेवण्यात आल्या होत्या. त्यात महाराष्ट्रातून बोरखेडा येथील केसचा समावेश होता. या हत्याकांडाची घटना व तपासात परीस्थितीजन्य पुरावे, इंटरनेटचा वापर, विविध ठिकाणचे सीसीटीव्हीचे सीडीआर, डीएनए चाचणी, शास्त्रोक्त व वैज्ञानिक पद्धतीचा केलेला वापर याची माहिती जिल्ह्याचे पोलीस अधीक्षक डॉ.प्रवीण मुंढे पीपीटीद्वारे दिली. केंद्रीय गृह मंत्रालयाच्या अखत्यारीतील इंडियन पोलिस सायन्स कॉन्फरन्स या संस्थेनेही बोरखेडा येथील हत्याकांडाच्या गुन्ह्याच्या डॉ.मुंढे यांनी केलेल्या तपासाची नोंद घेतली आहे. या संस्थेतर्फे दिल्लीत आगामी काळात होणार्‍या राष्ट्रीय पोलिस रीषदेत डॉ.मुंढे यांचा सहभाग असणार आहे.