केवायसीच्या बहाण्याने प्राध्यापिकेला 10 हजारात ऑनलाइन फसविले

जळगाव । एसबीआय बँकेत केवायसी अपडेट करण्याचे सांगून ऑनलाइन लिंक व ओटीपीच्या माध्यमातून एका प्राध्यापिकेची 10 हजारात फसवणूक केल्याची घटना 4 ऑगस्ट रोजी दुपारी उघडकीला आली. याप्रकरणी गुरूवारी दुपारी 2 वाजता अज्ञात व्यक्तीवर जिल्हापेठ पोलीस ठाण्यात गुन्हा दाखल करण्यात आला आहे.
अनुपमा प्रभात चौधरी (वय 52, रा. गजानन कॉलनी) या केसीईच्या आयएमआर महाविद्यालयात प्राध्यापिका आहेत. त्यांना आयएमआर कॉलेजमध्ये असताना बुधवारी दुपारी 1 वाजता एका अनोळखी नंबरवरुन मॅसेज आला. बँकेत केवायसी अपडेट करण्यासाठी एक लिंक पाठविली होती. त्या लिंकवरुन अनोळखी व्यक्तीने अनुपमा चौधरी यांच्याकडून पासवर्ड व ओटीपी नंबर घेतला. त्यानंतर त्या अज्ञात व्यक्तीने त्यांच्या खात्यातून 10 हजार रुपये परस्पर काढले. पैसे विड्रॉल झाल्याचा मॅसेज आल्यानंतर फसवणूक झाल्याचे स्पष्ट झाले. यानंतर अनुपमा चौधरी यांनी फिर्याद दिली. त्यावरुन जिल्हापेठ पोलीस ठाण्यात अज्ञात व्यक्तीविरुद्ध फसवणुकीची गुन्हा दाखल झाला आहे. तपास पोलीस निरीक्षक विलास शेंडे करीत आहेत.