कॉंग्रेस आरोपीला मुख्यमंत्री बनवीत आहे-अरुण जेटली

नवी दिल्ली-१९८४ मधील शीखविरोधी दंगलप्रकरणी दिल्ली हायकोर्टाने काँग्रेस नेते सज्जन कुमार यांना दोषी ठरवत जन्मठेपेची शिक्षा सुनावली. आजचा हा निकाल कॉंग्रेससाठी अतिमहत्त्वाचा ठरतो आहे. एकीकडे कॉंग्रेसचे तीन मुख्यमंत्री आज शपथ घेत आहे तर दुसरीकडे कॉंग्रेस विरोधात कोर्टाचा निर्णय आला आहे. यावरून अर्थमंत्री अरुण जेटली यांनी कॉंग्रेसवर निशाना साधला आहे. काँग्रेस शीखविरोधी दंगली प्रकरणातील दुसऱ्या एका आरोपीला मुख्मंत्रीपदाची शपथ देत आहे, अशा शब्दांत अरुण जेटली यांनी काँग्रेसवर हल्लाबोल केला.

शीख दंगलप्रकरणी आज हायकोर्टाने दिलेल्या निर्णयावर प्रतिक्रिया देताना अरुण जेटली म्हणाले, या दंगलप्रकरणात शीख समाज काँग्रेसच्या ज्या दुसऱ्या एका नेत्याला दोषी मानते त्या नेत्याला काँग्रेस आज मुख्ममंत्रीपदाची शपथ देत आहे. शिक्षा सुनावण्यात आलेले सज्जन कुमार हे १९८४ मध्ये झालेल्या शीख दंगलीचे प्रतिक आहेत. या प्रकरणात आता शिक्षा सुनावण्यास सुरुवात झाली असून त्यामुळे काँग्रेस आणि गांधी परिवाराच्या गळ्याभोवतीचा फास आवळला जात आहे.

या प्रकरणी हायकोर्टाकडून आलेल्या निर्णयाचे स्वागत आहे. कोर्टाची ही खूपच मोठी कामगिरी आहे. आमच्यापैकी अनेक जण या हत्याकांडाचे साक्षीदार होते. सर्वात भयंकर असे हे हत्याकांड होते. त्यावेळी काँग्रेस सरकारने दंगलीवर नियंत्रण मिळवण्यात अपयशी ठरले होते असे आरोप जेटली यांनी केले आहे.

काँग्रेस नेते सज्जन कुमार यांच्यासह मध्य प्रदेशच्या मुख्यमंत्रीपदाची शपथ घेत असलेले कमलनाथ यांच्यावर १९८४मध्ये दंगल घडवून आणल्याचा आरोप आहे. यांपैकी सज्जनकुमार यांना दिल्ली हायकोर्टाने आज दोषी मानत जन्मठेपेची शिक्षा सुनावली.