कॉंग्रेस पाठोपाठ भाजपलाही फेसबुकचा झटका; नमो अॅपशी संबंधित फेसबुक अकाउंट डिलिट

नवी दिल्ली: लोकसभा निवडणुकीच्या प्रचारासाठी सोशल मीडियाचा मोठ्या प्रमाणात वापर केला जातो आहे. दरम्यान निवडणूक आयोगाने सोशल मीडियावर विशेष लक्ष केंद्रित केले आहे. सोशल मीडियाच्या माध्यमातून आचारसंहितेच भंग होणार नाही याची काळजी घेण्याचे आवाहन करण्यात आले आहे. मात्र तरीही काही राजकीय पक्षांकडून याची अंमलबजावणी केली जात नाही. त्यामुळेच फेसबुकने काँग्रेसचे ८६७ पेजेस आणि अकाउंट डिलीट केले होते. त्यापाठोपाठ भाजपलाही जोरदार झटका दिला आहे. फेसबुकने भाजपच्या नमो अॅपशी संबंधित एका आयटी कंपनीचे फेसबुकवरील १५ पेजेस आणि अकाउंट डिलिट केले आहेत.

‘सिल्व्हर टच’ असे या आयटी फर्मचे नाव असून पंतप्रधान नरेंद्र मोदी यांच्या नमो अॅपशी संबंधित ही कंपनी आहे. भारतात सुरू असलेल्या लोकसभा निवडणुकीच्या पार्श्वभूमीवर फेसबुकने खोट्या बातम्या आणि माहिती पसरविणाऱ्या फेसबुक अकाउंटची साफसफाई सुरू केली आहे. त्याचाच एक भाग म्हणून काँग्रेसपाठोपाठ भाजपच्या नमो अॅपशी संबंधित सिल्व्हर टच कंपनीचे खोटे पेजेस हटविण्यात आले आहेत.

ही कंपनी फेसबुकवर भाजपशी संलग्न असलेल्या ‘द इंडिया आय’ नावाचं पेज चालवते. सिल्व्हर टचने फेसबुकवरील जाहिरातीसाठी ४८ लाख रुपये खर्च केले आहेत. तर कांग्रेसच्या ६८७ बनावट पेजेसच्या जाहिरातीसाठी सुमारे २७ लाख रुपये खर्च करण्यात आल्याचं फेसबुकच्या सायबर सेक्युरिटी पॉलिसी प्रमुख नॅथनील ग्लेशर यांनी म्हटलं आहे. यातील बऱ्याच पेजेसवरून मनाला वाट्टेल तो मजकूर पोस्ट केला जायचा. त्यात खोटी माहिती, दिशाभूल करणारा मजकूर सर्वाधिक असायचा. त्यामुळे हे पेजेस हटवण्यात आल्याचं ग्लेशर यांनी सांगितलं.