कोथळेच्या कुटुंबीयांना 10 लाखांची मदत
सांगली : सांगलीतील अनिकेत कोथळे हत्याप्रकरणात राज्य सरकार विशेष सरकारी वकील म्हणून उज्ज्वल निकम यांची नियुक्ती करण्याचा विचार करत असल्याची माहिती गृहराज्यमंत्री दीपक केसरकर यांनी दिली. तसेच अनिकेत कोथळेच्या कुटुंबीयांना सरकारकडून 10 लाख रुपयांची मदत जाहीर करत असल्याचे त्यांनी सांगितले.
तपास योग्य दिशेने सुरु
मुंबईत गृहराज्यमंत्री दीपक केसरकर यांनी पत्रकार परिषद देऊन कोथळे कुटुंबीयांना मदत जाहीर केली. मुख्यमंत्र्यांशी चर्चा केल्यानंतर हा निर्णय घेण्यात आल्याचे त्यांनी सांगितले. युवराज कामटे गुन्हा घडला त्या कालावधीत कुठे कुठे गेले याचा सखोल तपास केला जाईल, पोलिस कोठडीतील नियमांबाबत आढावा घेतला जाईल, असेही त्यांनी सांगितले. केसरकर म्हणाले, या प्रकरणाचा तपास 24 तासांत लागला असून सध्या तपास योग्य दिशेने सुरु आहे. जर सीआयडीचा तपास पुढे सरकला नाही तर सीबीआयचा विचार होतो. याप्रकरणातील साक्षीदार अमोल भांडारे आणि पीडित कोथळे कुटुंबीय यांना संरक्षण दिले जाईल.
पोलिसच झाले गुन्हेगार
चाकूचा धाक दाखवून लुटल्याप्रकरणी अटक केलेल्या अनिकेत कोथळेचा पोलिसांच्या मारहाणीत मृत्यू झाला होता. पुरावा नष्ट करण्यासाठी विश्रामबाग पोलिस ठाण्यातील पोलिस उपनिरीक्षक युवराज कामटे आणि त्यांच्या साथीदारांनी अनिकेतचा मृतदेह जाळण्याचा प्रयत्न केला. सुरुवातीला अनिकेत पळाल्याचा बनाव पोलिसांनी रचला होता. मात्र, सखोल चौकशीत पोलिसांचे बिंग फुटले आणि युवराजसह 12 पोलिसांना अटक करण्यात आली. आरोपीचा खून करून पोलिसच गुन्हेगार झाल्याने सांगलीत संतापाची लाट उसळली होती.