कोरपावली प्रभारी सरपंचासह चौघा सदस्यांचे राजीनामे

यावल- तालुक्यातील कोरपावली येथील आजी-माजी प्रभारी सरपंचासह ग्रामपंचायत सदस्यांनी राजीनामा दिल्याने खळबळ उडाली आहे. कोरपावली ग्रामपंचायतची शुक्रवारी सर्वसाधारण मासिक सभा सुरू असतांना सुमारे हजारावर संख्येने आलेल्या महिला व पुरूष ग्रामस्थांनी ग्रामपंचायतीवर मोचा काढत प्रभारी सरपंच व ग्रामसेवकांना गावातील पिण्याच्या पाण्याबाबत विचारणा केली. ग्रामसेवक प्रवीण ज्ञानेश्‍वर सपकाळे यांनी ग्रामपंचायतीत 11 सदस्य असून यातील सात ग्रामपंचायत सदस्य हे नियमित मासिक सर्वसाधारण सभेला उपस्थित राहत नसल्याने गावात कुठलेही विकास कार्य करणे शक्य नसल्याचे जमावाला सांगितले. माजी प्रभारी सरपंच जलील सत्तार पटेल म्हणाले की, मागील 9 महिन्यांपासून कोरपावली ग्रामपंचायत सरपंच पद रिक्त ाहे. प्रभारी सरपंच पदाच्या कार्यकाळात आपण सुमारे 25 लक्ष रुपयांचे गावातील सर्व पातळीवर विकासकामे केली आहेत मात्र काही राजकारणी गावाच्या विकास कार्यात अंतर्गत राजकारण करीत असल्याने गावातील कुठल्याही विकासकामाचा आम्हास निर्णय घेता येत नसल्याने माझ्यासह आमच्या प्रभारी सरपंच मनिषा अकील तडवी, सदस्य सरफराज अहमद तडवी व अमोल लक्ष्मण नेहते आपल्या ग्रामपंचायतच्या सदस्य पदाचा राजीनामा ग्रामसेवक यांच्याकडे सोपविला आहे.