कोरानावरील पहिली लस पुण्यात विकसित !

पुणे : कोरोना या विषाणूचा जगभरात फैलाव झाला आहे. चीनमध्ये अक्षरश: थैमान घातला आहे. २ हजारपेक्षा अधिक नागरिकांचा जीव कोरोनामुळे गेला आहे. भारतातही याचा शिरकाव झाला आहे. दरम्यान जीवघेण्या कोरोना व्हायरसवर पुण्यात लस विकसित करण्यात आली आहे. पुण्यातील सीरम इन्स्टिट्यूट ऑफ इंडियाने अमेरिकन बायोटेक्नॉलॉजी कंपनी कोडाजेनिक्सच्या मदतीने ही लस विकसित केली आहे. वैद्यकीय चाचणीसाठी ही लस प्राथमिक स्तरावर उपलब्ध करण्यात आली असून, सहा महिन्यांनतर रुग्णावर या लसीची चाचणी केली जाणार आहे.

कोरोना व्हायरसचे संक्रमण रोखण्यासाठी या लसीचा मोठा उपयोग होणार आहे, असा दावा संस्थेने केला आहे. या लसीमुळे रोगप्रतिकारक शक्ती वाढण्यास मदत होते, त्यामुळे कोरोनाचे संक्रमण रोखता येऊ शकेल. ही भारतातील पहिली लस असेल, जी इतक्या वेगाने या स्तरापर्यंत आणण्यात यश मिळालं आहे, असे सीरम इन्स्टिट्यूटने म्हटले आहे.