कोरेगाव भीमा प्रकरण :पुणे पोलिसांना ९० दिवसांची मुदतवाढ

पुणे : कोरेगाव भीमा हिंसाप्रकरणी अटक करण्यात आलेल्या आरोपींवर आरोपपत्र दाखल करण्यासाठी पुणे पोलिसांना ९० दिवसांची मुदतवाढ देण्यात आली आहे. या प्रकरणी सुधीर ढवळे, सुरेंद्र गडलिंग, रोना विल्सन, शोमा सेन आणि महेश राऊत अशा पाच जणांना अटक करण्यात आली आहे. त्यांना आज पुण्यातील शिवाजीनगर कोर्टात हजर करण्यात आलं होतं.

अटक करण्यात आलेल्या या पाचही आरोपींचा २८ ऑगस्टला अटक केलेल्या आरोपींशी संपर्क होता, अशी माहिती पुणे पोलिसांसमोर आली आहे. त्याचा तपास करण्यासाठी सरकारी वकील उज्ज्वला पवार यांनी वेळ मागितला होता. त्यामुळे कोर्टाने ही ९० दिवसांची मुदतवाढ दिली.

गेल्या ३१ डिसेंबर रोजी पुण्यातील शनिवारवाड्याच्या प्रांगणात एल्गार परिषद आयोजित करण्यात आली होती. दुसऱ्या दिवशी नगर रस्त्यावरील कोरेगाव भीमा येथे हिंसाचार उसळला होता. या परिषदेला माओवाद्यांकडून आर्थिक पुरवठा झाल्याच्या संशयावरून पुणे पोलिसांनी सुधीर ढवळे, प्रा. शोमा सेन, रोना विल्सन, अ‍ॅड. सुरेंद्र गडलिंग, महेश राऊत यांना अटक केली. या आरोपींच्या दोन ते अडीचशे ईमेलची पडताळणी करण्यात आली.