कोल्हापूरची अनुजा पाटील भारत ‘अ’ संघाची कर्णधार

मुंबई । बांगलादेश अ संघाबरोबर भारतात होणार्‍या एकदिवसीय आणि टी 20 मालिकेसाठी भारतीय अ संघाच्या नेतेपदाची धुरा मराठमोळ्या अनुजा पाटीलच्या खांद्यावर सोपवण्यात आली आहे. अनुजा पाटील ही मूळची कोल्हापूरची आहे. येत्या डिसेंबर महिन्यात कर्नाटक येथे बांग्लादेशच्या अ महिला क्रिकेट संघासोबत भारतीय महिलांचा अ संघ भिडणार आहे. या मालिकेत 2 डिसेंबरपासून तीन एकदिवसीय सामने हुबळी येथे खेळले जाणार आहे. तर 12 डिसेंबरपासून तीन टी 20 सामने बेळगावात होणार आहेत. त्याआधी बांगलादेशचा संघ 26 आणि 28 नोव्हेंबरला अलुरमध्ये दोन सराव सामनेही खेळणार आहे. बीसीसीआयने भारतीय अ संघाची घोषणा केली. यातील अभिमानाची बाब म्हणजे महाराष्ट्राच्या दोन लेकींची संघात निवड झाली आहे.

कोल्हापूरच्या अनुजा पाटीलकडे संघाच्या कर्णधारपदाची जबाबदारी असेल. तर बीडच्या कविता पाटीलनेही संघात स्थान मिळावलं आहे. अनुजा पाटील एकदिवसीय सामन्यांसह ट्वेण्टी 20 संघाचेही नेतृत्त्व करणार आहे. अनुजाने यापूर्वी टी 20 सामन्यात महिला संघाचे प्रतिनिधित्व केलं आहे. ऑस्ट्रेलियाविरुद्धच्या मालिकेत अनुजाने छाप पाडली होती.

भारतीय संघ : एकदिवसीय क्रिकेट : अनुजा पाटील (कर्णधार), एस. मेघना, नेहा तानवार, नझुहत परवीन, कविता पाटील, प्रती बोस, शिवांगी राज, देविका वैद्य, वी. आर. वनिता, जेमिमा रॉड्रिग्ज, निनू चौधरी, मानसी जोशी, सुकन्या परिदा, प्रियांका प्रियदर्शनी, एम. डी.थिरुशकामिनी.

ट्वेन्टी 20 संघः अनुजा पाटील (कर्णधार), एस. मेघना,जेमिमा रॉड्रिग्ज, स्वागतिका राठ, पूजा वस्त्रकार, टी. पी. कानवार, सोनी यादव, राम्या दोशी, वी आर वनिता, डी हेमलता, देविका वैद्य, तान्या भाटिया, मेघना सिंह, राधा यादव, तरन्नुम पठाण.