खंबाटकी घाटात चिखलाचा पाट

सातारा: पुणे-बंगळुरु महामार्गावरील खंबाटकी परिसरात झालेल्या मुसळधार पावसामुळे शुक्रवारी रात्री या घाटातच महापुराची परिस्थिती निर्माण झाली होती. ही पूरपरिस्थिती एवढी भीषण होती की, वाहन चालकांचाही थरकाप उडाला. खंबाटकी घाट परिसरात काल संध्याकाळी जोरदार पाऊस झाल्याने पावसाचे पाणी घाटवळणावरुन रस्त्यावर आल्याने काही काळ वाहतूक पूर्णपणे ठप्प झाली.

राष्ट्रीय महामार्ग क्रमांक 4 चे पुणे ते सातारा दरम्यान सहापदरीकरण करुन रुंदीकरणाचे काम सुरु आहे. या कामादरम्यान पावसाच्या पाण्याला वाट करुन देण्यासाठी तात्पुरती मोरी तयार करण्यात आली आहे. खंबाटकी घाट परिसरात काल दुपारनंतर झालेल्या पावसानंतर या मोरीतून पाणी रस्त्यावर आले. सोबत माती आणि राडरोडाही होता. पाण्याच्या मोठ्या प्रवाहामुळे दरड कोसळली असावी असे वाटले परंतु तसा प्रकार नव्हता. वरच्या भागातील पाण्याला वाहून जाण्यासाठी केलेली ही सोय होती.