खगोल विश्‍वाची घडणार 3D सैर!

पुणे । पुणे महापालिकेच्या राजीव गांधी इ-लर्निंग स्कूलमध्ये तारांगण साकारण्यात आले आहे. रशियन तंत्रज्ञानाच्या ध्वनीचित्रफिती व चष्म्याशिवाय दिसणारी त्रिमितीय दृष्य हे या तारांगणाचे वैशिष्य असून असे तारांगण तयार करणारी देशातील पहिलीच महापालिका बनण्याचा बहुमान यामुळे महापालिकेला मिळाला आहे. तारांगणासाठी पुढाकार घेणारे माजी उपमहापौर, ज्येष्ठ नगरसेवक आबा बागूल यांनी या तारांगणाचा परिचय करून दिला. माजी आमदार उल्हास पवार यावेळी उपस्थित होते.

दिवंगत केंद्रीय विज्ञान व तंत्रज्ञान मंत्री विलासराव देशमुख यांचे नाव तारांगणाला देण्यात आले आहे. विद्यार्थी व नागरिक यांच्यासाठी लवकरच ते खुले करण्यात येईल. मुख्यमंत्री देवेंद्र फडणवीस व राज्याच्या सात माजी मुख्यमंत्र्यांच्या उपस्थितीत येत्या महिनाअखेरीस त्याचे उद्घाटन होणार आहे.

एकूण 8 शो होतील
तीन वर्षे एका कंपनीकडे या प्रकल्पाच्या देखभाल दुरुस्तीची जबाबदारी आहे. सकाळी 10 ते सायंकाळी 8 यावेळात एकूण 8 शो होतील. त्यात सायं. 5पर्यंतचे शो शालेय विद्यार्थ्यांसाठी असतील. त्यानंतर 5 ते 8वाजेपर्यंत नागरिकांसाठी खुले असेल. त्याचे शुल्क सर्वसाधारण सभा मान्य करेल तेवढे असेल. ते माफक असावे असे सुचवले आहे. साडेनऊ मीटरचा व्यास असणारा गोलाकार डोम असून त्यावर सर्व त्रिमितीय दृष्ये दिसतील. एकूण 8 प्रोजेक्टर आहेत. त्याच्या साह्याने या डोमवर दृष्य साकार होते. आसनांची रचनाही मागे अगदी रेलून बसता येईल अशी केली आहे. त्यामुळे बरोबर डोळ्यांच्या वरच्या बाजूला हा गोलाकार डोम येतो. त्यामुळे आपण अंतराळातच आहोत असा भास होतो. संपूर्ण प्रेक्षागार वातनुकुलीत आहे. एकूण 52 आसने आहेत. अंतराळातील घडामोडींवर आधारीत रशिया तसेच नासाने बनवलेले लघुचित्रपट यात दाखवण्यात येणार आहेत. खगोल अभ्यासक तसेच विद्यार्थ्यांना यातून अंतराळ संशोधनाची आवड निर्माण होईल तसेच ग्रह, तारे, पृथ्वी, सूर्य, चंद्र यांचे स्वरूपही जाणून घेता येईल.

शरद पवार यांचे सहकार्य
तारांगणात येण्यासाठी स्वतंत्र लिफ्ट आहे. शाळेतील विद्यार्थ्यांना प्रेक्षकांचा त्रास होणार नाही. तारांगण पाहायला येणार्‍यांसाठी दोन प्रतीक्षागृहे आहेत. तिथे त्यांना शो पाहण्यापूर्वी प्राथमिक माहिती दिली जाईल. शो पाहून झाल्यानंतर काही शंका असतील तर त्याची उत्तरेही दिली जातील. यासाठी ज्येष्ठ नेते व मुंबईतील नेहरू तारांगणाचे अध्यक्ष शरद पवार यांनी सर्व सहकार्य देण्याचे आश्‍वासन दिले आहे अशी माहिती बागूल यांनी दिली.

गोलाकार डोम व एकूण 8 प्रोजेक्टर
साडेनऊ मीटरचा व्यास असणारा गोलाकार डोम असून त्यावर सर्व त्रिमितीय दृष्ये दिसतील. एकूण 8 प्रोजेक्टर आहेत. त्याच्या साह्याने या डोमवर दृष्य साकार होते. संपूर्ण प्रेक्षागार वातनुकुलीत आहे. एकूण 52 आसने आहेत. अंतराळातील घडामोडींवर आधारीत रशिया तसेच नासाने बनवलेले लघुचित्रपट यात दाखवण्यात येणार आहेत.