खडसेंकडे ‘रामटेक’ची 15 लाखांची थकबाकी

मुंबई । महाराष्ट्रातील भाजप नेते आणि माजी महसूल मंत्री एकनाथ खडसे यांनी अजूनही ‘रामटेक’ बंगल्याच्या वापरापायी असलेली 15 लाख 50 हजार रुपयांची थकबाकी परत केली नाही, त्यामुळे सार्वजनिक बांधकाम खात्याने पुन्हा एकदा खडसे यांना स्मरणपत्र पाठवले आहे. सार्वजनिक बांधकाम खात्याच्या माहितीनुसार माजी मंत्री एकनाथ खडसे यांस वितरित केलेला शासकीय बंगला ‘रामटेक’ बाबत माहिती विचारली होती. त्यावर माजी महसूल मंत्री एकनाथ खडसे यांनी 4 जून 2016 रोजी राजीनाम्यानंतर 19 जून 2016 रोजी त्यांनी बंगला रिकामा करणे आवश्यक होते.

मंत्रिपदानंतर बंगला वापरण्याची होती परवानगी
नियमानुसार माजी मंत्र्यांना पहिले 15 दिवस हे शासकीय निवासस्थान निःशुल्क असते त्यानंतर शासनाच्या परवानगीने पुढील 3 महिन्यांसाठी 100 रुपया इतका दंड आकार निश्‍चित केला आहे. शासनाने खडसे यांना रामटेकमध्ये राहण्यासाठी 3 महिन्यांची परवानगी दिली होती. माजी महसूल मंत्री एकनाथ खडसे हे वास्तव्य करीत असलेले शासकीय निवासस्थान ‘रामटेक’ बंगला वापरापोटी असलेली 19 नोव्हेंबर 2016 पर्यंतची थकबाकी 15 लाख 49 हजार 975 रुपये इतकी आहे. ना.दा. मार्ग येथील शासकीय बंगला ‘रामटेक’ येथे एकनाथ खडसे, माजी मंत्री यांनी 19 नोव्हेंबर 2014 मध्यान्ह पूर्व पासून बंगल्याचा ताबा घेतला असून 19 नोव्हेंबर 2016 रोजी बंगल्याचा ताबा सार्वजनिक बांधकाम विभागाच्या ताब्यात दिलेला आहे.

दोषी अधिकार्‍यांवर कारवाईची मागणी
सामान्य प्रशासन विभाग शासकीय निवासस्थान वितरित करत असून रिक्त करण्याची खबरदारी त्याच विभागाकड़ून करणे अपेक्षित असताना त्या बाबीची दखल घेतली जात नाही. खडसेंच्या थकबाकीची वसुली त्यांच्या वेतनातून वळते करण्याची मागणी याप्रकरणी माहिती अधिकारात माहिती मागवणारे अनिल गलगली यांनी देवेंद्र फडणवीस यांना लिहिलेल्या पत्रात केली आहे. संबंधित अधिकार्‍यांची जबाबदारी निश्‍चित करण्याची मागणीही त्यांनी केली आहे.