खदानीत तरुणाचा बुडून मृत्यू

नवी मुंबई । तुर्भे एमआयडीसीतील खदानीच्या पाण्यात बुडून तरुणाचा मृत्यू झाल्याची घटना शनिवारी सायंकाळी घडली. या प्रकरणाची नोंद तुर्भे एमआयडीसी पोलीस ठाण्यात करण्यात आली आहे. प्रथमेश माने (१६) असे या दुर्घटनेत मृत पावलेल्या तरुणाचे नाव असून तो सीवूड्समधील टिळक ज्युनिअर कॉलेजमध्ये अकरावीत शिकत होता.

प्रथमेश कॉलेजमधली पार्टी संपल्यानंतर तीन मित्रांसमवेत तुर्भे एमआयडीसीतील खदानामध्ये फोटोसेशन करण्यासाठी गेला होता. त्यावेळी प्रथमेश आणि त्याच्या मित्रांनी तेथील खदानामध्ये सेल्फी फोटो काढले.प्रथमेशला पोहता येत नसतानाही तो फोटो काढण्यासाठी खदानातील पाण्यामध्ये उतरला. खदानातील पाणी खोल असल्याने तो त्या पाण्यात बुडू लागला.सदर प्रकार खदानाबाहेर उभ्या असलेल्या त्याच्या तिघा वर्गमित्रांना निदर्शनास आल्यानंतर संकेत आचार्य हा त्याला वाचविण्यासाठी पाण्यात उतरला, मात्र तोपर्यंत प्रथमेश पाण्यात बुडून गेला.