खेडी बु! शिवारातील विहिरीत आढळला मृतदेह

जळगाव । खेडी बु! शिवारातील एका शेतात सकाळी 40 ते 45 वयोगटातील अनोळखी पुरूषाचा मृतदेह तरंगतांना आढळून आल्याने एकच खळबळ उडाली आहे. याप्रकरणी शेतमालकाने एमआयडीसी पोलिस ठाण्यात दिलेल्या खबरीवरून अकस्मात मृत्यूची नोंद करण्यात आली आहे. दरम्यान, अनोळखी पुरूषाचा मृतदेह एक ते दोन दिवसांपासून विहिरीत पडून असल्याचा अंदाज पोलिसांना वर्तविला असून ओळख पटविण्याचा प्रयत्न पोलिस करीत आहेत.

पोलिसांची घटनास्थळी धाव
खेडी बुद्रूक शिवारातील गोदावरी महाविद्यालयाच्या शेजारीच दिपक प्रकाश महाजन (रा.रिंगरोड) यांच्या मालकीचे शेत आहे. सोमवारी सकाळी महाजन हे शेतात आल्यानंतर त्यांना विहिरीत अनोळखी पुरूषाचा मृतदेह पाण्यात तरंगतांना आढळून आला. याबाबत त्यांनी लागलीच एमआयडीसी पोलिस ठाण्यात माहिती दिल्यानंतर सहाय्यक फौजदार अतुल वंजारी, बशिर तडवी तसेच प्रकाश पाटील यांनी खेडी महाजन यांचे शेत गाठले व दुपारी विहिरीतून मृतदेह बाहेर काढला. त्यानंतर पोलिसांनी पंचनामा करीत मृतदेह जिल्हा रूग्णालयात हलविला. मयत अनोळखी पुरूषाचे अंदाजे 40 ते 45 वयोगट असून गेल्या एक ते दोन दिवसांपासून या पुरूषाचा बुडून मृत्यू होवून मृतदेह विहिरीत पडलेला असावा, असा अंदाज पोलिसांनी वर्तविला आहे. याप्रकरणी शेतमालक महाजन यांनी दिलेल्या खबरीवरून एमआयडीसी पोलिसात अकस्मात मृत्यूची नोंद करण्यात आली आहे. यातच तपास सफौ.अतुल वंजारी हे करीत असून मयताची ओळख पटविण्यासाठी ते प्रयत्न करीत आहेत.