गटारींची स्वच्छता करा; अतिक्रमण तात्काळ हटवा!

जळगाव: शहरातील जोशी कॉलनीतील सप्तश्रृंगी मंदिर ते मुकुंदनगर या परिरासह प्रभाग 16 मधील विविध परिसराला ’उपमहापौर आपल्या दारी’ उपक्रमांतर्गत उपमहापौर सुनील खडके यांनी मंगळवार, 15 डिसेंबर रोजी भेट दिली. मुख्य गटार नळाला पाणी येते त्यादिवशी ओव्हरफ्लो होऊन रस्त्यावरून पाणी वाहते. त्यामुळे रस्त्याची वाट लागली आहे तर हेमू कलानी उद्यानाला लागून असलेली गटार साफ करण्यात येत नसल्याने पाणी वाहत नसल्याची तक्रार नागरिकांनी केली. उपमहापौर सुनील खडके यांनी लागलीच मुकादमला बोलावून त्याबाबत सूचना केल्या. तसेच नवलनगर अंध शाळेकडे जाणार्‍या रस्त्यावरील अतिक्रमण हटविण्याचे देखील सांगितले.

गटारीवर कल्हर्ट बसवा
यावेळी उपमहापौरांसोबत महिला व बालकल्याण सभापती रंजना सपकाळे, नगरसेवक मनोज आहुजा, रेश्मा काळे, मिनाक्षी पाटील, भरत सपकाळे, मनोज काळे, कुंदन काळे, अनिल जोशी, सुशील हासवानी आदींसह मनपा अधिकारी उपस्थित होते. नवलनगरकडे जाणार्‍या झोपड्यांचे अतिक्रमण काढावे आणि नागरिकांची पर्यायी व्यवस्था करण्याची कार्यवाही करावी असे उपमहापौर सुनील खडके यांनी सांगितले. श्री गुरू गोरक्षनाथ मंदिर समोरील गटारीवर कल्व्हर्ट बसविल्यास मोठी समस्या दूर होईल असे नागरिकांनी सांगितले.

मोकळ्या जागेवर उद्यान विकसित करा
लक्ष्मीनगरातील नाला पुढे अरुंद असल्याने पाणी वाहण्यास अडचण येते अशी बाब नगरसेवकांनी मांडली असता नाल्याची पुढील दिशा आणि विकास प्लॅनबाबत दोन दिवसात माहिती सादर करावी, अशा सूचना उपमहापौर सुनील खडके यांनी दिल्या. तसेच सम्राट कॉलनीत रस्ते खराब झाले असून एलईडी लाईट नसल्याची समस्या नागरिकांनी सांगितली. रस्त्यांची तात्काळ डागडुजी करावी अशा सूचना उपमहापौरांनी दिल्या. तसेच टीएमनगर समोरील मोकळ्या जागेवर उद्यान विकसित करण्यात येत आहे. सध्या उद्यान अर्धवट विकसित केलेले असून लोखंडी गेटला कुलूप लावण्यात आलेले आहे. उद्यान नागरिकांसाठी विकसित करून खुले करावे अशा सूचना उपमहापौर सुनील खडके यांनी दिल्या.