गणेशोत्सवातील विविध क्षण पाहण्याची पुणेकरांना संधी

सार्वजनिक गणेशोत्सवानिमित्त छायाचित्र प्रदर्शन : महापौरांच्या हस्ते उद्घाटन

पुणे । शतकोत्तर रौप्य महोत्सवी सार्वजनिक गणेशोत्सवाच्या निमित्ताने पुणे महानगरपालिकेने पुणे श्रमिक पत्रकार संघाच्या सहकार्याने छायाचित्र प्रदर्शनाचे आयोजन केले आहे. या प्रदर्शनाचे उद्घाटन गुरुवारी महापौर मुक्त टिळक यांच्या हस्ते झाले. यावेळी पत्रकार संघाचे अध्यक्ष शैलेश काळे, सभागृह नेते श्रीनाथ भिमाले, स्थायी समिती अध्यक्ष मुरलीधर मोहळ आदी उपस्थित होते.

4 सप्टेंबरपर्यंत खुले
हे प्रदर्शन सारस बागेसमोरील महानगरपालिकेच्या हिंदुहृदयसम्राट बाळासाहेब ठाकरे कलादालनात भरविण्यात आले आहे. 4 सप्टेंबरपर्यंत सकाळी 11 ते रात्री 11 पर्यंत हे प्रदर्शन नागरिकांसाठी खुले राहणार आहे. गणेशोत्सवातील विविध कालावधीतील, विविध प्रसंगानुरूप छायाचित्रे प्रदर्शनात पाहता येणार आहेत.

छायाचित्रांतून पुणे दर्शन
हिंदुहृदयसम्राट व व्यंगचित्रकार स्व. बाळासाहेब ठाकरे यांनी रेखाटलेली व्यंगचित्रे तसेच पुणे शहरातील ऐतिहासिक वास्तू, शैक्षणिक संस्था यांची छायाचित्रे व माहिती, त्रिशुंड गणपती मंदिर, चतु:श्रृंगी मंदिर, पर्वती मंदिर, सारसबाग मंदिर, दगडूशेठ मंदिर, पाताळेश्वर मंदिर, वेताळ टेकडी, तळजाई टेकडी, शनिवारवाडा, नानावाडा, विश्रामबागवाडा, आगाखान पॅलेस, महात्मा फुले वाडा, शिंदेची छत्री, डेक्कन कॉलेज, अभियांत्रिकी महाविदयालय, फर्ग्युसन महाविद्यालय, सावित्रीबाई फुले पुणे विद्यापीठ, एनडीए, पुणे रेल्वे स्टेशन, पुणे विमानतळ, पुणे शहरातील रस्ते, अशा विविध विषयाशी संबंधित छायाचित्रे व माहिती प्रदर्शनात नागरिकांना पाहता येणार आहे.