गणेशोत्सवासाठी स्वयंसेवकांचे प्रशिक्षण उपयुक्त

पुणे। शहरातील गणेशोत्सव, नवरात्र निर्धोकपणे पार पडण्याकरिता स्त्री आधार केंद्राच्या कार्यकर्त्यांची मदत होईल. याकरिता त्यांना प्रशिक्षित करण्यात आले असून पोलिसांना मदतीसाठी ते तयार आहेत, असे मत आमदार डॉ. नीलम गोर्‍हे यांनी शुक्रवारी येथे व्यक्त केले. संस्थेच्या वतीने या उत्सवांच्या काळात शहरात स्वयंसेवक नेमण्यात येतात. त्यांचे काम अधिक चांगल्या रीतीने होण्यासाठी त्यांना हे प्रशिक्षण देण्यात येते. हा गणेशोत्सव निर्विघ्नपणे पार पडावा अशी अपेक्षादेखील यावेळी डॉ. गोर्‍हे यांनी व्यक्त केली.

त्या म्हणाल्या, आपत्तीच्या वेळी फोटो काढण्याऐवजी मदत करावी. कोणत्याही अनोळखी, आकस्मिक ठिकाणी सेल्फी न घेता अनावश्यक सेल्फींचा मोह टाळावा. या काळात पावसाळी वातावरणात सुरक्षितपणे वावरून ठिकठिकाणी असलेल्या उघड्या तारांपासून दूर राहावे. महिलांनी गर्दीच्या ठिकाणी मोबाइलचा अनावश्यक वापर टाळावा. स्वयंसेवकांनी उत्सवांच्या काळात आपल्या भागातील परिस्थितीचा आढावा घ्यावा, आवश्यक प्रसंगी संस्थेशी संपर्क करावा. यावेळी अतिरिक्त पोलीस आयुक्त शशिकांत शिंदे यांनी ‘सुरक्षितता’ तर पुणे पोलिसांच्या बॉम्बस्फोट प्रतिबंधक दलाच्या वतीने प्रशांत शिंदे यांनी ‘बॉम्बस्फोट प्रसंगी घ्यायची काळजी आणि प्रतिबंधात्मक उपाय’ या विषयावर माहिती दिली. राष्ट्रीय आपत्ती निवारण पथकाचे निरीक्षक एस.बी. इंगळे व त्यांच्या सहकार्‍यांनी सप्रात्यक्षिक माहिती दिली.

येत्या 23 ऑगस्टला संस्थेत सकाळी 11 ते 2 या वेळेत या प्रशिक्षित स्वयंसेवकांना ओळखपत्र वितरण करण्याचा कार्यक्रम होईल. प्रशिक्षण पूर्ण केलेल्या महिलांना ही ओळखपत्रे देण्यात येतील. यासाठी केंद्राच्या कार्यालयात ज्योती कोटकर, अनिता शिंदे, विभावरी कांबळे व अश्विनी शिंदे यांची समिती तयार करण्यात आली आहे. स्वयंसेवकांनी त्यांच्याशी संपर्क करावा, असे आवाहन यावेळी करण्यात आले.

मुंबई शहर पोलिस दलाचे उपायुक्त दीपक देवराज, पोलिस निरीक्षक प्रतिभा मुळे, सहायक पोलिस निरीक्षक अंजना बोराडे, स्त्री आधार केंद्राच्या विश्वस्त झेलम जोशी, मीना इनामदार, ज्योती कोटकर व पुणे, बारामती, खडकी, सिंहगड रस्ता परिसरातील महिला कार्यकर्त्या तसेच डेक्कन जिमखाना, स्वारगेट, हडपसर वानवडी, भारती विद्यापीठ, कोथरूड, शिवाजीनगर, विश्रांतवाडी, खडक पोलीस ठाण्याच्या हद्दीतील महिला स्वयंसेवक उपस्थित होत्या.