गणेशोत्सवा दरम्यान विद्युतपुरवठा सुरळीत ठेवावा

चिंचवड : गुरूवारपासून पिंपरी-चिंचवड शहरात नुकतेच गणपती बाप्पांचे आगमन झाले आहे. संपूर्ण शहरात हा उत्सव घरांघरांमध्ये, शाळांमध्ये, आस्थापनांमध्ये, कंपनीमध्ये तसेच सार्वजनिक मंडळांमध्ये साजरा केला जातो. सर्वत्र गणेशोत्सव मोठा धार्मिक सण म्हणून आनंदान आणि उत्साहात पार पाडला जातो. अनेकदा शहरामध्ये वेळी-अवेळी वीज बंद केली जाते. मात्र गणेशोत्सवाच्या पवित्र वातावरणात साजरा होत आहे. त्यामुळे संपूर्ण गणेशोत्सवाच्या काळात विद्युतपुरवठा सुरळीत ठेवावा, अशी मागणी महावितरण समितीचे सदस्य मधुकर बच्चे यांनी महावितरण अभियंता शिवाजी वायफळकर यांच्याकडे केली आहे. या मागणी बाबतचे निवेदन बच्चे यांनी दिले आहे. यावेळी भारती विनोदे, सौरभ शिंदे, गणेश बच्चे, सौरभ कर्नावट आदी उपस्थित होते.

दिलेल्या निवेदनात मधुकर बच्चे यांनी म्हटले आहे की, गणेशोत्सवात सर्वात महत्वाचे काम महावितरण प्रशासनाचे असते. गेल्या वर्षी महावितरणकडून काही ठिकाणी नागरिकांना हलगर्जीपणा जाणवला होताा. त्यामुळे नागरिकांमध्ये काही प्रमाणात नाराजी होती. म्हणून या वर्षी महावितरण प्रशासनाने शहरात विद्युत पुरवठा सुरळीत व कायम राहील याची दक्षता घ्यावी. पुढील दहा दिवसांत नागरिकांची तक्रारच येणार नाही याची काळजी घ्यावी. कदाचित तक्रार आलीच तर त्वरित दखल घेऊन काम करावे. यासाठी पुढील दहा दिवसाचे शहरात विद्युत पुरवठा सुरळीत ठेवण्याचे योग्य नियोजन करावे व जनतेस गणेशोत्सव साजरा करण्यास सहकार्य करावे.

अनेकदा नागरिकांनी आपल्या तक्रारी घेऊन महावितरण कार्यालयात येतात. मात्र त्यांच्या तक्रारींकडे दुर्लक्ष केले जाते. त्यामुळे आता सणा-सुदीच्या काळात महावितरणने या तक्रारींकडे लक्ष द्यावे. त्यामुळे आता महावितरण कंपनीने याकडे लक्ष द्यावे.