गद्दारांना पुन्हा पक्षात घेणार नाही!

अजित पवारांनी ठणकावले

मुंबई : जोपर्यंत आपण राष्ट्रवादीमध्ये कार्यरत असू तोपर्यंत बंडखोरी केलेल्या गद्दारांना पुन्हा पक्षात घेणार नाही, अशा निर्वाणीच्या भाषेत राष्ट्रवादी काँग्रेसचे नेते अजित पवार यांनी बंडखोरांना ठणकावले. त्यांच्या बोलण्याचा ओघ बीडमधील बंडखोर नेते सुरेश धस यांच्याकडे होता. एखाद्याला संधी दिल्यानंतर त्याचे सोने करायचे की त्याची राख करायची हे ज्याच्या त्याच्या हाती असते. पण ज्यांनी स्वत:च्या पहिलीला सोडले नाही, ते इतरांना काय सोडणार असा टोलाही त्यांनी धस यांचा नामोल्लेख टाळून लगावला. दरम्यान, सुरेश धस यांनीही पवारांच्या या टीकेला उत्तर दिले असून, येत्या दोन दिवसांत पवारांना त्यांच्याच शब्दांत उत्तर देऊ, असा इशारा दिला.

पवारांना दुसर्‍याचे वाकून पहायाची सवय : धस
बीड जिल्हा परिषद निवडणुकीनंतर धस यांच्या पाच सदस्यांनी भाजपला पाठिंबा दिल्यापासून राष्ट्रवादीचे नेते आणि सुरेश धस यांच्यात कुरबुरी सुरू झाल्या होत्या. दरम्यान, एका कार्यक्रमानिमित्त मुंबईत आल्यानंतर अजित पवारांनी धस यांचे नाव न घेता त्यांच्या बंडखोरीवर भाष्य केले. पवारांची टीका जिव्हारी लागलेल्या धस यांनीही प्रत्युत्तर देत, येत्या एक दोन दिवसांत पवारांना त्यांच्याच भाषेत उत्तर देऊ, असा इशाराच दिला. पवारांचे आपले ठेवायचे झाकून अन् दुसर्‍याचे पाहायचे वाकून असा स्वभाव असल्याचे ते म्हणाले.