गरीब विद्यार्थीनींसाठी मानव विकास मिशन अंतर्गत बसेस वाढवा

धुळे । शिरपूर तालुक्यासाठी फक्त 7 एसटी बसेस मानव विकास मिशन अंतर्गत सेवा देत आहेत. परंतु विद्यार्थींनीची संख्या जास्त असल्यामुळे तालुक्यातील 1300हून अधिक विद्यार्थीनी या योजनेपासून वंचित आहेत. यासंदर्भात शिरपूर भारतीय जनता पार्टीचे तालुकाध्यक्ष राहुल रंधे यांनी प्रथम एसटी महामंडळ शिरपूर येथील सहाय्यक आगार प्रमुख श्री पाटील यांची भेट घेऊन चर्चा केली. या चर्चेत हा सर्व विषय शिक्षण विभागाचा आहे असे त्याच्याकडून सांगण्यात आले. यानंतर गट शिक्षण अधिकारी पंचायत समिती शिरपूर रणदिवे यांची भेट घेऊन शिरपूर तालुक्यातील किती विद्यार्थीनी या लाभापासून वंचित आहे याची माहिती घेतली.

वाढीव बसचे प्रस्ताव
या समस्यांची चर्चा जिल्हाधिकारी व मानव विकास मिशनचे जिल्हा नियोजन अधिकारी आर.ए.पवार यांच्याशी केली असता ही समस्या धुळे जिल्ह्यातील चारही तालुक्यांची आहे असे पाटील यांनी सांगितले. चारही तालुक्यात प्रत्येकी 7 बसेस दिल्या गेल्या आहेत. या संदर्भात जिल्हाधिकारी पांढरपट्टे यांनी भाजपा तालुकाध्यक्ष राहुल रंधे यांच्या निवेदनाची गंभीर दखल घेऊन चार ही तालुक्यांचे वाढीव बसेसचे प्रस्ताव तात्काळ बनविण्यास सांगितले. या विषयाची या खास बाब म्हणून मानव विकास मिशनचे आयुक्त भास्कर मुंडे यांच्याशी चर्चा करू असे आश्वासन जिल्हाधिकारी पांढरपट्टे यांनी दिले.