गर्भपिशवीतील पावणे तीन किलोची गाठ काढली

मुंबई । हिंदुहृदयसम्राट बाळासाहेब ठाकरे वैद्यकीय महाविद्यालय व डॉ. रुस्तम नर्सी कूपर सर्वसाधारण रुग्णालयहे 940 खाटांचे विलेपार्ले येथे मुंबई महापालिकेचे प्रमुख रुग्णालय जुहू येथे असून याच रुग्णालयात उपचारासाठी आलेल्या एका 36 वर्षीय महिलेच्या गर्भपिशवित आढळून आलेली मोठी गाठ काढण्याची अवघड शस्त्रक्रिया नुकतीच यशस्वीपणे करण्यात आली. अधिष्ठाता डॉ. गणेश शिंदे यांच्या नेतृत्वात तज्ज्ञ डॉक्टरांच्या चमुने केलेल्या या शस्त्रक्रियेदरम्यान तब्बल 2.75 किलो वजनाची गाठ सदर महिला रुग्णाच्या पोटातून काढली. दरम्यान, शस्त्रक्रियेनंतर महिलेची प्रकृती आता उत्तम आहे, अशी माहिती रुग्णालय प्रशासनाने दिली.

महिलेची प्रकृती आता उत्तम
मात्र, ही गाठ अतिशय मोठी असल्याने व ही गाठ काढताना होऊ शकणारा संभाव्य धोका लक्षात घेऊन अशा प्रकारच्या शस्त्रक्रिया करण्याचा वर्षांचा अनुभव असणा-या अधिष्ठाता डॉ. गणेश शिंदे यांनी स्वत:च सदर शस्त्रक्रिया करण्याचा निर्णय घेतला. त्यानुसार डॉ. गणेश शिंदे, सहाय्यक प्राध्यापिका डॉ. हेमलता कुहिते, डॉ.हेमा रेलवानी, डॉ. नेही पारिख या तज्ज्ञ डॉक्टरांच्या चमूने सलग दोन तास चाललेल्या शस्त्रक्रियेदरम्यान रुग्ण महिलेच्या पोटातून 2.75 किलो वजनाची म्हणजेच सुमारे पावणे-तीन किलो वजनाची मोठी गाठ काढली आहे.

शस्त्रक्रीयेसाठी आलेल्या अडचणी
काही दिवसांपूर्वी कूपर रुग्णालयात एक महिला पोटदुखी व रक्तस्रावाची तक्रार घेऊन उपचारासाठी आली होती. या आधीच दोन मुलांची आई असलेल्या व आर्थिक दृष्ट्या कमकुवत असलेल्या या महिलेचे पोट हे साधारणपणे 7 महिन्यांच्या गरोदर महिलेप्रमाणे दिसत होते. या महिलेची अधिक तपासणी व आवश्यक त्या अत्याधुनिक चाचण्या केल्या असता, महिलेच्या गर्भपिशवीत मोठी गाठ आढळून आली. ही गाठ वाढती असल्याने तसेच या गाठीचा रुग्णाच्या जिविताला असणारा संभाव्य धोका लक्षात घेऊन शक्य तितक्या लवकर शस्त्रक्रिया करण्याचे निश्‍चित करण्यात आले. मात्र, त्यावेळी महिलेच्या रक्तातील हिमोग्लोबिनचे प्रमाण केवळ 4 होते. तसेच सातत रक्तस्राव चालू होता. त्यामुळे शस्त्रक्रिया करणे धोक्याचे होऊ शकले असते. ही बाब लक्षात घेऊन शस्त्रक्रियेपूर्वी हिमोग्लोबिनचे प्रमाण वाढविण्यासाठी व रक्तस्राव थांबविण्यासाठी औषधोपचार करण्यात आले. त्यानंतर हिमोग्लोबिन योग्य प्रमाणात वाढल्यावर आणि रक्तस्राव थांबल्यानंतर तात्काळ शस्त्रक्रिया करण्याचा निर्णय रुग्णालय प्रशासनाने घेतला.