गवळीमाथा चौकात तरुणावर गोळीबार

पिंपरी-चिंचवड : भोसरी येथील गवळीमाथा चौकात दुचाकीवरून आलेल्या अज्ञातांनी एका तरुणावर गोळीबार केला. विजय पांडुरंग घोलप (वय 34, रा. गवळी माथा, भोसरी) असे त्याचे नाव असून तो गंभीर जखमी झाला आहे. गोळीबाराचे नेमके कारण अद्याप समजू शकले नाही. ही घटना शनिवारी सकाळी सहाच्या सुमारास घडली. दरम्यान, शहरात गेल्या 24 तासांत गोळीबाराची दुसरी घटना घडली आहे. यामुळे शहरात एकच खळबळ उडाली आहे.

पाच गोळ्या झाडल्या
पोलिसांनी दिलेल्या माहितीनुसार, विजय हा पूर्वी शिवसेनेचा कार्यकर्ता होता. सध्या तो कोणत्याही पक्षाचे काम करत नाही. त्याचे गवळीमाथा येथे जय महाराष्ट्र या नावाने स्नॅक्स सेंटर आहे. शनिवारी सकाळी सहाच्या सुमारास तो स्नॅक्स सेंटरचे शटर उघडत होता. त्याचवेळी पाठीमागून दुचाकीवरून हेल्मेट घालून आलेल्या अज्ञात आरोपींनी विजय याच्यावर पाच गोळ्या झाडल्या. या गोळ्या विजय याच्या दंडावर, हातावर, कमरेवर लागल्या आहेत. यामध्ये तो गंभीर जखमी झाला असून त्याच्यावर चिंचवड येथील निरामय रुग्णालयात उपचार सुरू आहेत. गोळीबाराचे नेमके कारण अद्यापर्यंत समजू शकले नाही. भोसरी एमआयडीसी पोलीस तपास करत आहेत.

लागोपाठ घटनांनी खळबळ
दरम्यान, पिंपरी-चिंचवड शहरात गेल्या 24 तासातील ही सलग दुसरी घटना आहे. काल पिंपरीतील साधू वासवानी उद्यानाजवळील एका हॉटेलमध्ये दिवसाढवळ्या संतोष कुरावत या सराईत गुन्हेगारावर धारदार शस्त्राने हल्ला करून गोळीबार करण्यात आला होता. शहरात लागोपाठ घडलेल्या दोन गोळीबारांच्या घटनेमुळे प्रचंड खळबळ उडाली असून नागरिकांमध्ये भीतीचे वातावरण पसरले आहे. तसेच यामुळे शहरातील शांतता व सुव्यवस्था धोक्यात आली असून पोलिसांच्या कार्यपद्धतीवर प्रश्नचिन्ह उपस्थित करण्यात येत आहे.