गाव-पाड्यांचे विद्युतीकरण करा

नंदुरबार । विद्युत विभागामार्फत विद्युतीकरण करतांना जिल्ह्यातील सर्व गाव-पाड्यांवर विद्युतीकरण करावे, ज्या ठिकाणी ट्रॉन्सफार्मरची आवश्यकता आहे त्याठिकाणी त्वरीत ट्रॉन्सफार्मर बसविण्याची कार्यवाही करावी असे खासदार डॉ. हिना गावीत यांनी आवाहन केले. त्या एकात्मिक ग्रामीण विकास कार्यक्रम व इतर केंद्र पुरस्कृत योजनांची अंमलबजावणी, पर्यवेक्षण व संनियंत्रण, उपलब्ध निधीची तरतुद, उपाययोजना, विचार विनिमय व त्याबाबत कार्यवाही होण्यासाठी जिल्हा ग्रामीण विकास यंत्रणा, नंदुरबार यांच्यावतीने आयोजित जिल्हा विकास समन्वय व सनियंत्रण समितीची सभेत अध्यक्षस्थानावरून बोलत होत्या. ही सभा जिल्हाधिकारी कार्यालयाच्या बिरसा मुंडा सभागृहात आज घेण्यात आली. या बैठकीला माजी मंत्री तथा आमदार डॉ. विजयकुमार गावीत, जिल्हाधिकारी डॉ मल्लिनाथ कलशेट्टी, जिल्हा पोलीस अधिक्षक संजय पाटील, जिल्हा परिषदेचे मुख्य कार्यकारी अधिकारी रविंद्र बिनवडे, अतिरिक्त मुख्य कार्यकारी अधिकारी बी.एम. मोहन, समितीचे अशासकीय सदस्य डॉ. कांतीलाल टाटीया, नारायण सामुद्रे, बळीराम पाडवी, सविता जयस्वाल, शहादा, अक्कलकुवा, पंचायत समिती सभापती,व विविध अंमलबजावणी यंत्रणांचे प्रमुख उपस्थित होते.

विविध विषयांचा आढावा
समिती सदस्य डॉ. टाटीया, नारायण सामुद्रे, बळीराम पाडवी, सविता जयस्वाल यांनी यावेळी वीज कनेक्शन, विद्युत ट्रान्सफार्मर, रस्त्यांची कामे, शासकीय आश्रमशाळा, वसतीगृह, आरोग्य, रोहयोची कामे, शिक्षण पोषण आहार आदी विषयांवर विविध मुद्दे उपस्थित करुन त्यावर केलेल्या कारवाईबाबत संबंधित विभागाकडून माहिती घेतली.

केंद्र पुरस्कृत विकास कामांचा आढावा
या बैठकीत केंद्र पुरस्कुत योजनांचा सन 2017-18 मधील माहे सप्टेंबर-2017 अखेर विकास कामांचा आर्थिक व भौतिक आढावा घेण्यात आला. यामध्ये स्वच्छ भारत मिशन, महात्मा गांधी राष्ट्रीय ग्रामीण रोजगार हमी योजना, राष्ट्रीय ग्रामीण आरोग्य अभियान, सर्व शिक्षा अभियान, प्रधानमंत्री ग्रामसडक योजना, राजीव गांधी ग्रामीण विद्युतीकरण योजना, आदिवासी विभागाकडील योजना, राष्ट्रीय ग्रामीण पाणी पुरवठा योजना, प्रधानमंत्री आवास योजना, राष्ट्रीय ग्रामीण जीवनोन्नती अभियान, एकात्मिक पाणलोट व्यवस्थापन कार्यक्रम, राष्ट्रीय सामाजिक अर्थ सहाय्य योजना, राष्ट्रीय वृध्दपकाळ निवृत्ती वेतन योजना, राष्ट्रीय कुटूंब अर्थसहाय्य योजना, अन्नपूर्णा योजना, राष्ट्रीय भूमी अभिलेख आधुनिकीकरण कार्यक्रम, या योजनावर खासदार डॉ. हिना गावीत यांनी चर्चा करुन आढावा घेतला

यंत्रणांनी वेळेत कामे पूर्ण करावीत
खा. हिना गावित पुढे म्हणाल्या की, प्रधानमंत्री ग्राम सडक योजनेअंतर्गत सुरु असलेल्या कामांना गती देवून कामे पूर्ण करावीत. आरोग्याबाबत रुग्णास वेळेत आरोग्य सेवा उपलब्ध होण्यासाठी आरोग्य विभागातील अधिकार्‍यांची नेहमी सतर्क राहावे.आमदार डॉ. विजयकुमार गावीत यांनी यावेळी सांगितले विविध अंमलबजावणी यंत्रणांनी दिलेले कामे वेळेत पूर्ण करावीत म्हणजेच आलेला निधी खर्च होईल. विकास कामे तांत्रिक, प्रशासकीय अडचणींमुळे थांबली असल्यास ती जास्त काळ प्रलंबित न ठेवता त्याबाबत तात्काळ पाठपुरावा करुन कामे पूर्ण करावीत. जिल्हाधिकारी डॉ. कलशेट्टी यांनी सांगितले, योजना जिल्ह्यात राबवितांना येणार्‍या अडचणी सोडविण्यासाठी सम्वय ठेवावा.