गुंतवणूकीत जादा व्याजाच्या आमिषाने जळगावातील व्यापार्‍याला गंडा
जळगाव : शहरातील जिल्हापेठ परीसरातील व्यापार्‍याला बँकेच्या कर्मचार्‍याने गुंतवणूकीचे आमिष दाखवत जादा व्याजाच्या आमिषाने तब्बल 39 लाखांचा गंडा घातला. या प्रकरणी जिल्हापेठ पोलिस ठाण्यात दोघांविरोधात गुन्हा दाखल करण्यात आला.
दोघांविरोधात गुन्हा दाखल
विलास डोंगरलाल जैसवाल (69, रा.सागर अपार्टमेंट, जिल्हापेठ, जळगाव) हे व्यापारी आहेत. शहरातील महाबळ येथील स्टेट बँकेत नोकरी करणारे प्रसाद सोनार यांच्याशी 30 डिसेंबर 2018 रोजी त्यांची ओळख झाली. त्यावेळी प्रसादने त्यांचा विश्वास संपादन करून स्टेट बँकेत व्याज व्यवस्थित मिळत नाही, असे सांगून, मी सांगतो त्या ठिकाणी पैसे गुंतवा आम्हाला त्यातून 10 ते 15 टक्के व्याज मिळेल व तुम्हाला पाच टक्के प्रतिमहिना व्याज देवू, असे सांगितले. या आमिषाला विलास जैसवाल बळी पडले आणि प्रसाद सोनार आणि त्याचा मित्र विपुल लखीचंद चौधरी (रा.धानोरे, ता.चोपडा) यांना वेळीवेळी 38 लाख 87 हजार 500 रुपये दिले. पैसे देवूनही कोणताही परतावा मिळत नसल्याने आपली फसवणूक झाल्याचे लक्षात आले. त्यांनी तातडीने जिल्हापेठ पोलीस ठाण्यात धाव घेवून तक्रार दिल्यानंतर शनिवार, 21 मे रोजी विलास जैसवाल यांच्या फिर्यादीवरून संशयीत आरोपी प्रसाद सोनार आणि त्याचा मित्र विपुल लखीचंद चौधरी (रा.धानोरे, ता.चोपडा) यांच्यावर जिल्हा पेठ पोलीसात गुन्हा दाखल करण्यात आला आहे. पुढील तपास सहाय्यक पोलिस निरीक्षक किशोर पवार करीत आहे.