गुन्हा असेल तर निवडणूक लढवण्यास आजन्म बंदीची शिफारस
नवी दिल्ली : गुन्हेगारी पार्श्‍वभूमीच्या उमेदवारांना निवडणूक लढणे आता अवघड होणार आहे. कारण एखाद्या गुन्ह्याअंतर्गत शिक्षा झालेल्या व्यक्तीला जन्मभर निवडणूक लढवण्यावर बंदी घालण्याच्या प्रस्तावाला केंद्रीय निवडणूक आयोगाने पाठिंबा दिला आहे. सर्वोच्च न्यायालयात या आशयाचे प्रतिज्ञापत्र निवडणूक आयोगाने सादर केले आहे.
त्याचप्रमाणे सध्या लोकप्रतिनिधी म्हणून निवडून आलेल्या ज्या व्यक्तींवर फौजदारी खटले सुरू आहेत, त्यांचा निकाल लवकरात लवकर लागावा यासाठी विशेष न्यायालय स्थापन करण्याच्या शिफारसीलाही आयोगाने पाठिंबा दिला. दिल्लीत भाजपचे प्रवक्तेे आणि वरिष्ठ वकील अश्‍विनी कुमार उपाध्याय यांनी याविषयी एक जनहित याचिका दाखल केलीय. त्यावर सर्वोच्च न्यायालयाने निवडणूक आयोगाचे मत विचारले होते. आम्ही याचिकाकर्त्याच्या मताशी सहमत आहोत असे म्हटले आहे. पण याविषयी केंद्रीय विधी आणि न्याय खात्याशी निवडणूक आयोगाची अनेकदा चर्चा झाली आहे. आता लोकप्रतिनिधी अधिनियमात बदल करण्याचे काम सरकारी पातळीवर प्रलंबित असल्याचेही आयोगाने प्रतिज्ञापत्रात नमूद केले आहे.