गुरुपौर्णिमेनिमित्त भक्तांची मांदियाळी

बुलडाणा । विदर्भातील पंढरी म्हणून बुलडाणा जिल्ह्यातील शेगावची ओळख आहे. गुरुपौर्णिमेनिमित्त शेगावला गजानन महाराजांच्या दर्शनासाठी राज्यभरातून हजारो भाविक दर्शनासाठी येतात आणि आपली इच्छा गजानन महाराजांकडे प्रकट करतात. आजही गजानन महाराजांच्या मंदिरात भक्तांची मांदियाळी होती. संपूर्ण मंदिर परिसर गण गण गणात बोते या गजानन महाराजांच्या जयघोषाने दुमदुमून निघाला होता.

विदर्भाची पंढरी
गजानन महाराजांना आपले गुरु मानून त्यांचा आशीर्वाद घेण्यासाठी भाविक शेगावला येत असतात. यामुळे संतनगरी शेगावला भक्तीमय स्वरुप येते. गुरुपौर्णिमेच्या दिवशी बुलडाणा जिल्ह्यातून पायी दिंड्या शेगावात दाखल होतात. विदर्भाची पंढरी अशी ओळख असलेल्या शेगावमध्ये पायी वारी करत येणार्‍या भाविकांचीही मोठी संख्या आहे. मलकापूर येथील सुमारे 1500 भाविकांची पायी वारी जवळपास 12 वर्षांपासून शेगावला येत असते आणि आपल्या भावना प्रकट करत असतात.