गोंधळ थांबत नसल्याने विधानसभेचे कामकाज दिवसभरासाठी तहकूब !

नागपूर: नागपूर विधीमंडळाचे अधिवेशन सुरु आहे. आज अधिवेशनाचे दुसरे दिवस आहे. दुसऱ्या दिवशी भाजप आमदारांनी सभागृहात प्रचंड गदारोळ केला. शेतकऱ्यांना तातडीने २५ हजारांची मदत जाहीर करण्याची मागणी करत भाजप आमदारांनी सभागृहात गदारोळ केला. यावेळी भाजप-शिवसेना आमदारांमध्ये धक्काबुक्की देखील झाली. भाजप आमदारांनी मुख्यमंत्र्यांसमोर बॅनर फडकविले. सुरुवातीला अर्ध्या तासासाठी सभागृह तहकूब करण्यात आले होते, त्यानंतर दहा मिनिटासाठी सभागृह तहकूब झाले. मात्र विरोधकांचा गोंधळ कमी होत नसल्याने शेवटी विधानसभा सभागृह दिवसभरासाठी तहकूब करण्यात आले आहे.

भाजप आमदारांनी मुख्यमंत्री उद्धव ठाकरे यांच्यासमोर बॅनर फडकविले. हीबाबत निंदनीय असल्याचे सानाग्त विधानसभा अध्यक्ष नाना पाटोले यांनी नाराजी व्यक्त केली. सभागृहात बॅनर फडकविण्याची घटना ही निंदनीय असून दुसऱ्यांदा जर असा प्रकार घडला तर कारवाई करेल अशी समजवजा इशारा अध्यक्षांनी विरोधी आणि सत्ताधारी पक्षाच्या आमदारांना दिला. विरोधकांकडून नियमांची पायमल्ली होणार नाही. विरोधी आमदार संयमाने वागतील याची ग्वाही विरोधी पक्षनेते देवेंद्र फडणवीस यांनी दिली.

पहिल्या दिवशी कॉंग्रेस नेते राहुल गांधींनी सावरकरांबद्दल केलेल्या विधानावरून आक्रमक भूमिका घेतली होती. आज दुसऱ्या दिवशी शेतकऱ्यांच्या प्रश्नावरून भाजपने विधानसभेत गदारोळ केला. मुख्यमंत्री उद्धव ठाकरे यांनी सत्तेत आल्यास शेतकऱ्यांना २५ हजार रुपये हेक्टरी मदत देण्याची आश्वासन दिले होते. त्यामुळे त्यांनी शब्द पाळून शेतकऱ्यांना मदत जाहीर करावी अशी मागणी करत भाजप आमदारांनी सभागृहात गदारोळ केला.