गोव्यात राष्ट्रपती राजवट लागू करा- काँग्रेस

पणजी- मुख्यमंत्री मनोहर पर्रिकर आणि अन्य दोन मंत्र्यांची अनुपस्थिती पाहता गोव्यात राष्ट्रपती शासन लागू करण्याची मागणी काँग्रेसने केली आहे. पर्रिकर सध्या उपचारासाठी अमेरिकेत गेले आहेत. राज्य सध्या संवैधानिक संकटाचा सामना करत आहे. मागील सहा महिन्यांपासून राज्यातील प्रशासन व्यवस्था कोलमडली आहे. राज्यात सध्या राष्ट्रपती शासनाची गरज आहे, त्यासाठी राज्यपाल मृदुला सिन्हा यांची वेळ मागितली आहे, असे गोवा काँग्रेसचे प्रवक्ते रमाकांत खलप यांनी म्हटले.

प्रकृती अस्वास्थामुळे पर्रिकर सातत्याने अनुपस्थित असतात. त्यांनी आपला प्रभारही दुसऱ्यांकडे सोपवलेला नाही. त्याचबरोबर गोव्याचे ऊर्जा मंत्री पांडुरंग मडकाईकर आणि शहर विकास मंत्री फ्रान्सिस डिसुजा हेही आजारी आहेत. पर्रिकर आणि हे दोन्ही मंत्री राज्यात कधीपर्यंत परतणार हे निश्चित नाही. जेव्हा राज्य संवैधानिक संकटाचा सामना करत असेल अशावेळी राज्यपाल मृदुला सिन्हा यांनी याप्रकरणी हस्तक्षेप केला पाहिजे, असे खलप यांनी म्हटले.

पर्रिकर हे याचवर्षी मार्च ते जून दरम्यान उपचारासाठी अमेरिकेत गेले होते. ते पुन्हा १० ऑगस्टला अमेरिकेला आणि २२ ऑगस्टला परतले होते. त्यानंतर त्याच्या दुसऱ्या दिवशी ते मुंबईतील एका खासगी रूग्णालयात दाखल झाले होते. आता ते पुन्हा एकदा अमेरिकेला गेले आहेत. ते ८ सप्टेंबरला भारतात परतणार आहेत. डिसुझा हेही मागील महिन्यात उपचारासाठी अमेरिकेत गेले होते. तर मडकाईकर यांच्यावरही ५ जूनपासून रूग्णालयात उपचार सुरू आहेत.