गोसंवर्धनासाठी पोलिसांनी पुढाकार घ्यावा

पिंपरी-चिंचवड : शहरातील भटक्या गायींचे रक्षण करण्यासाठी महापालिका व पोलीस प्रशासनाने पुढाकार घ्यावा. गोहत्येसारख्या घटनांनी समाजात धार्मिक तेढ निर्माण करण्याचा प्रयत्न करणार्‍या दुष्प्रवृत्तींवर कायद्याची जरब बसवून त्यांच्यावर आळा घालावा, असे आवाहन खासदार अमर साबळे यांनी केले. शहरात मागील आठ दिवसांच्या कालावधीत सांगवी आणि भोसरी परिसरात अज्ञात समाजकंटकांनी दोन गायींची कत्तल केल्याच्या निंदनीय घटना घडल्या आहेत. या पार्श्वभूमीवर खासदार साबळे यांनी भोसरी पोलीस ठाण्याला नुकतीच भेट दिली. याप्रसंगी ते बोलत होते.

कठोर कारवाईचे आश्‍वासन
याप्रसंगी भोसरीचे वरिष्ठ पोलीस निरीक्षक दिलीप कुलकर्णी, नगरसेवक विलास मडेगिरी, संभाजी फुगे, सुभाष सरोदे, विजय शिनकर आदी उपस्थित होते. वरिष्ठ पोलीस निरीक्षक दिलीप कुलकर्णी यांनी संबंधित समाजकंटकांविरोधात कलम 5, 5 अ आणि 5 ब अंतर्गत गुन्हा दाखल करण्यात आले असून, परिसरातील सीसीटीव्ही फुटेज तपासण्याचे काम सुरू असल्याची माहिती दिली. तसेच या घटनेतील आरोपींना लवकरच अटक करण्यात येईल, असे आश्वासनही त्यांनी खासदार साबळे यांना दिले.