गौरी लंकेश यांचे मारेकरी लवकरच सापडतील
बंगळुरू : पुढील काही आठवड्यांमध्येच गौरी लंकेश यांचे मारेकरी गजाआड असतील, असा विश्‍वास कर्नाटकचे गृहमंत्री रामलिंगा रेड्डी यांनी व्यक्त केला आहे. 5 सप्टेंबर रोजी गौरी लंकेश यांची गोळ्या घालून हत्या करण्यात आली होती. या घटनेने सगळा देश हादरला होता. गौरी लंकेश यांच्या हत्येचा तपास करणार्‍या विशेष तपास पथकाकडे हल्लेखोरांविरोधात सबळ पुरावे आहेत. हे पुरावे नेमके काय आहेत हे आत्ता सांगणे योग्य ठरणार नाही. एसआयटीने कोणत्या दिशेने तपास केला आहे याबाबत मला माहिती आहे असेही रेड्डी यांनी सांगितले.
दाभोलकर, पानसरेंसारखे होणार नाही
महाराष्ट्रात नरेंद्र दाभोलकर आणि गोविंद पानसरे या दोन विचारवंतांच्या हत्या झाल्या. त्यांचे मारेकरी अद्याप मोकाटच आहेत. मात्र पत्रकार गौरी लंकेश यांच्याबाबतीत असे घडणार नाही. त्यांचे मारेकरी लवकरात लवकर पकडले जातील असा विश्‍वास रेड्डी यांनी व्यक्त केला. ते प्रेस क्लब ऑफ बंगळुरू रिपोर्टर गिल्ड तर्फे आयोजित एका संमेलनात बोलत होते.
संशयिताचे फोटो मिळाले
5 सप्टेंबर 2017 रोजी गौरी लंकेश यांची त्यांची राहत्या घरात हत्या करण्यात आली. या प्रकरणी पोलिसांनी 17 ऑक्टोबर रोजी एका संशयिताचे रेखाचित्र जारी केले. एसआयटीने सीसीटीव्ही फुटेज अमेरिकेतील लॅबमध्ये पाठवले, त्याआधारे संशयिताचे फोटो मिळवले आहेत. गौरी लंकेश यांच्या घराजवळ असलेल्यी सीसीटीव्ही कॅमेराच्या आधारे हे फुटेज एसआयटीला मिळाले. काही प्रत्यक्षदर्शींनी दिलेल्या माहितीनुसार रेखाचित्रही तयार करण्यात आले आहे.