ग्रामसेवकांचे पंचायत समित्यांसमोर धरणे

पुणे । विविध मागण्यांसाठी जिल्ह्यातील ग्रामसेवकांचे असहकार आंदोलन बुधवारपासून (दि. 1) सुरू आहे. आंदोलनाचा आता दुसरा टप्पा म्हणून जिल्ह्यातील सर्व पंचायत समित्यांसमोर धरणे आंदोलन करण्यात येणार असल्याची माहिती महाराष्ट्र राज्य ग्रामसेवक युनियनच्या पुणे शाखेचे अध्यक्ष चंद्रकांत जगताप यांनी दिली.

ग्रामसेवकांच्या प्रश्‍नांबाबत मार्ग न निघाल्यास 14 नोव्हेंबरपासून जिल्हास्तरावर धरणे आंदोलन करण्यात येणार असल्याचेही जगताप यांनी नमूद केले. गेले सहा दिवस ग्रामसेवकांचे असहकार आंदोलन सुरू असून प्रशासनाला कोणतेही अहवाल आणि माहिती न पाठविता जिल्हा परिषद प्रशासनाची कोंडी करण्याचा संघटनेने प्रयत्न केला आहे. महाराष्ट्र राज्य ग्रामसेवक युनियन संघटनेच्या जिल्हाभरातील 1 हजार 163 ग्रामसेवकांनी आंदोलनात सहभाग घेतला आहे. ग्रामविकास अधिकारी आणि विस्तार अधिकारी यांच्या पदोन्नती देण्यासाठी, तसेच पदोन्नतीस दिरंगाई केल्यामुळे संबंधित सेवकास जबाबदार धरण्यात येऊन त्याच्यावर शिस्तभंगाची कारवाई व्हावी. आदिवासी भागात काम करणरर्‍या ग्रामसेवकांवर एकस्तर पदोन्नती वेतनश्रेणीचा आणि प्रोत्साहन भत्ता लाभाची अद्यापपर्यंत अंमलबजावणी झाली नाही. 1 नोव्हेंबर 2015 नंतर सेवेत रुजू झालेल्या ग्रामसेवकांच्या कपात केलेल्या 10 टक्के रकमा डीसीपीएसमध्ये जमा करण्यात आल्या नाहीत.

तसेच सर्वोच्च न्यायालयाच्या आदेशानुसार 3 महिन्यांपेक्षा अधिक कालावधीत निलंबित झालेल्या ग्रामसेवकास पुनर्स्थापित करण्यासाठी न्यायालयाचा अवमान झाल्याबद्दल संबंधित अधिकारी आणि सेवकांवर जबाबदारी निश्‍चित करून शिस्तभंगाची कारवाई करण्यात यावी. सहाव्या वेतन आयोगातील फरक रकमा जमा करण्यात याव्यात. ग्रामसेवकांचे पगार दर महिन्याच्या 5 तारखेला करण्यात यावेत. मागील दोन वर्षांत ग्रामसेवक संवर्गाचे पगार वेळेत झाले नाहीत.