घरफोड्यांना 12 पर्यंत पोलिस कोठडी

जळगाव। जीवननगरात प्लॉट क्रमांक 22 मध्ये 1 एप्रिल ते 3 एप्रिल दरम्यान चोरट्यांनी घरफोडी करून 39 हजार रुपयांचा ऐवज लंपास केला होता. या प्रकरणी रामानंदनगर पोलिस ठाण्यात चोरीचा गुन्हा दाखल होता. त्या गुन्ह्यात पोलिसांनी सोमवारी एकाला तर मंगळवारी दुसर्‍या संशयिताला ही अटक केली असून दोघांना आज मंगळवारी मुख्य न्यायदंडाधिकारी के.एस. कुलकर्णी यांच्या न्यायालयात हजर केले असता 12 मे पर्यंत पोलिस कोठडी सुनावली आहे.

39 हजारांच्या ऐवजावर चोरट्यांचा डल्ला
जीवनगरातील भूषण शांताराम गुरव (वय 33) हे 1 एप्रिल ते 3 एप्रिल दरम्यान गावाला गेलेले होते. त्या दरम्यान चोरट्यांनी त्यांच्या घराच्या दरवाजाचा कडी कोयंडा तोडून लोखंडी कपाट फोडून त्यातून 29 हजार रुपयांचे सोन्या, चांदीचे दागिने आणि 10 हजार रुपये रोख असा एकूण 39 हजार रुपयांचा ऐवज लंपास केला होता. या प्रकरणी पोलिसांनी राजेंद्र उर्फ सोपराजा दत्तात्रेय गुरव (वय 29, रा. वाघनगर) याला सोमवारी ताब्यात घेतल्यानंतर 9 पर्यंत पोलिस कोठडी सुनावली होती. दरम्यान, मंगळवारी पोलिसांना दुसरा संशयित राहूल संदिप सोनवणे (वय-27 रा. नाशिक) याला अटक करण्यातही यश आले. दोघा संशयितांना आज मंगळवारी मुख्य न्यायदंडाधिकारी के. एस. कुलकर्णी यांच्या न्यायालयात हजर करण्यात आले. न्या. कुलकर्णी यांनी दोघांना 12 मे पर्यंत पोलिस कोठडी सुनावली आहे.