चंदा कोचरच्या दिराची सीबीआय चौकशी

राजीव कोचर यांना मुंबई विमानतळावर अडवले

मुंबई । व्हिडिओकॉन समूहाशी आर्थिक लागेबांधे असल्याच्या आरोपावरून आयसीआयसीआयच्या प्रमुख चंदा कोचर याचे दीर राजीव कोचर यांना काल संध्याकाळी मुंबई विमानतळावर सीबीआयच्या अधिकार्‍यांनी चौकशीसाठी थांबवले. कोचर यांचे पती दीपक कोचर यांच्या व्हिडिओकॉन समूहाशी असलेल्या आर्थिक लागेबांध्यांवरून आयसीआयसीआय बँकेला मोठ्या प्रमाणात नुकसान झाल्याचे प्रकरण सध्या गाजते आहे.

व्हिडिओकॉन प्रकरणात लाचखोरीचा आरोप
याच प्रकरणात राजीव कोचर यांनी दीपक कोचर यांच्या कंपनीसाठी काम करताना लाचखोरी केल्याचा सीबीआयचा संशय आहे. प्राप्तिकर विभागाने दीपक कोचर यांच्याविरोधात आधीच चौकशीची नोटीस बजावली आहे. राजीव कोचर हे अनिवासी भारतीय असून, सध्या सिंगापूरमध्ये अविस्टा अ‍ॅव्हायसरी ग्रुपचे सीईओ आहेत. अविस्टा अ‍ॅव्हायसरी ग्रुप ग्राहकांना कर्जपुरवठा आणि बाजारातून पैसे उभे करण्यासाठी सल्ले देतो. गेल्याच आठवड्यात व्हिडिओकॉन आणि आयसीआयसीआयच्या कर्ज घोटाळ्याप्रकरणी सीबीआयने राजीव कोचर यांना चौकशीत सहकार्य करण्यास सांगितले होते. मुंबई विमानतळावर त्यांची चौकशी झाल्यावर त्यांना सोडून दिल्याचे सूत्रांनी सांगितले.